Grabitet gjerdani me 673 diamante me vlerë 4.3 milionë dollarë

Një grabitje e bujshme ka ndodhur në Muzeun e Arteve të Aplikuara në Vjenë, ku dy persona kanë arritur të marrin një gjerdan të rrallë të zbukuruar me 673 diamante.

Bizhuteria, e punuar nga shtëpia e njohur “Van Cleef & Arpels”, ishte pjesë e një ekspozite në muze. Sipas të dhënave të “Sotheby’s”, gjerdani ishte shitur në një ankand në Nju Jork për rreth 4.3 milionë dollarë në vitin 2015.

Policia austriake bëri të ditur se dy burra ende të paidentifikuar hynë në veprim gjatë orarit kur muzeu ishte i hapur për vizitorët. Ata thyen vitrinën ku mbahej bizhuteria, morën gjerdanin dhe më pas u larguan.

Autoritetet kanë publikuar pamje ku shfaqen dy personat e dyshuar brenda ambienteve të muzeut, të veshur me rroba të errëta. Nga grabitja nuk raportohet për persona të lënduar.

Përveç vlerës së konsiderueshme financiare, gjerdani ka edhe një histori të veçantë. Ai besohet se mund të jetë bizhuteria që dikur i përkiste mbretëreshës Nazli të Egjiptit.

Mbretëresha Nazli e kishte mbajtur gjerdanin në vitin 1939, gjatë dasmës së vajzës së saj, princeshës Fawzia, me princin e atëhershëm të kurorës së Iranit, Mohammad Reza Pahlavi, i cili më vonë u bë Shah i Iranit.

Policia austriake po punon për identifikimin dhe kapjen e autorëve, ndërsa rrethanat e plota të grabitjes mbeten nën hetim.