Avokati Arben Llangozi ka publikuar një video sipas të cilit, drejtori i AMP-së në Vlorë, Genci Kolgjini përdor fjalë të...
LIFESTYLE
Kafeja gjithnjë e më e hidhur/ Një filxhan vlen...sa ari
PiranjatPërditësimi i fundit 8 Korrik 2026, 19:16
Sa vlen një filxhan kafe? Sipas kuotimeve të fundit në tregjet financiare, madje më shumë se ari. Ekspertët e konsiderojnë kafen një investim më të mirë edhe se shumë kriptomonedha.
Megjithatë, kjo nuk është një lajm i mirë për konsumatorët, pasi rritja e çmimeve po rëndon xhepat e atyre që nuk heqin dorë nga kafja e mëngjesit.
Por çfarë e ka kthyer kafen në një produkt kaq të shtrenjtë? Sipas analistëve, përgjegjës janë ndryshimet klimatike, të cilat kanë ndikuar negativisht në prodhimin bujqësor global, si dhe faktorët gjeopolitikë që kanë ushtruar presion mbi tregjet.
Vonesat në korrjen e kafesë në Brazil, prodhuesi më i madh në botë, rënia e rezervave në bursat e mallrave dhe rreziqet që lidhen me fenomenin klimatik El Niño kanë nxitur një rritje të fortë të çmimeve. Si rezultat, kontratat e së ardhmes (futures) për kafen janë rritur me rreth 43% krahasuar me nivelin më të ulët të regjistruar në fillim të qershorit, duke arritur afërsisht 239 centë për paund.
"Nuk ka pasur asnjë kriptomonedhë kryesore dhe as ari, pavarësisht rekordit të tij, që t'i afrohej një lëvizjeje ditore kaq të madhe", thuhet në analizën e publikuar nga Yahoo! Finanza.
Ndryshimet klimatike, mes përmbytjeve dhe thatësirave, po luajnë një rol gjithnjë e më të madh jo vetëm në tregjet bujqësore, por edhe në ato financiare. Kjo pasi kushtet ekstreme të motit po ndikojnë drejtpërdrejt në prodhimin e kafesë dhe, si pasojë, në çmimet ndërkombëtare.
Çmimi i kafesë ka arritur deri në 350 centë për paund, duke iu afruar niveleve më të larta të këtij viti. Më 6 korrik, kontratat e së ardhmes (futures) për kafen Arabica me afat dorëzimi në shtator regjistruan rritjen më të madhe ditore që nga viti 2000, me një kërcim prej mbi 15%.
Edhe Robusta, varieteti më ekonomik dhe më rezistent i kafesë, që prodhohet kryesisht në Azinë Juglindore, shënoi një rritje prej 8%, duke kaluar nivelin e 4.100 dollarëve për ton.
Si pasojë e kësaj situate, edhe kafeja, kultivimi i së cilës është veçanërisht i ndjeshëm ndaj ndryshimeve klimatike, i është bashkuar rritjes së përgjithshme të çmimeve të lëndëve të para. Ndërkohë, edhe ari vijon të tregtohet në nivele shumë të larta, duke qëndruar gjatë korrikut mbi 4.000 dollarë për ons.
Rritja e çmimeve po godet drejtpërdrejt konsumatorët. Dhe nuk bëhet fjalë vetëm për adhuruesit e kafesë. Edhe ata që konsumojnë produkte të ëmbla do të përballen me kosto më të larta, pasi pritet që kakaoja dhe sheqeri të shtrenjtohen më tej. /Piranjat News/
