Kafeja më e shtrenjtë në botë nga jashtëqitja e kësaj maceje po “gatuan” pandeminë e ardhshme

Kafeja më e shtrenjtë në botë prodhohet nga jashtëqitja e një maceje të egër, mund të shkaktojë një shpërthim virusi të ngjashëm me Covid-in, kanë paralajmëruar ekspertët. Kafeja “kopi luwak” mund të kushtojë mijëra paund për një qese në Mbretërinë e Bashkuar dhe shitet në vende si Harrods. Kokrrat e saj marrin shijen e veçantë pasi kalojnë nëpër sistemin tretës të një maceje të rrallë aziatike e quajtur civet. Këto kafshë mbahen në kushte çnjerëzore dhe josanitare në kafaze në vende si Indonezia.

Organizata për të drejtat e kafshëve PETA ka vizituar dhjetëra prej këtyre vendeve dhe ka paralajmëruar se ato mund të “gatuajnë pandeminë e ardhshme”. Elisa Allen, nënkryetare e programeve në PETA, i tha gazetës The Sun: “Futja e kafshëve të egra në kushte të ndyra dhe të mbipopulluara krijon një situatë perfekte për patogjenë të rrezikshëm, duke na afruar rrezikshëm me pandeminë e ardhshme.”

Sipas PETA-s, macet civet shpesh kapen nga natyra në Azinë Juglindore kur janë më pak se gjashtë muajsh dhe shiten në tregje nëpër Azi. Ata ushqehen me forcë me një dietë me kokrra kafeje, të cilat përmbajnë brenda farat e kafesë. Civet-ët i tresin pjesërisht këto kokrra përmes enzimave të forta në stomakun e tyre, duke ndryshuar strukturën e proteinave të kokrrave.

Deri në momentin që civet-ët i nxjerrin jashtë kokrrat, fara përfundimtare nuk ka më aciditetin e lartë të një filxhani të zakonshëm kafeje. Kjo krijon një shije më të butë se kafeja që gjendet në supermarket, prandaj edhe shitet me çmim më të lartë në kafene. Por civet-ët mund të bartin sëmundje infektive që mund të kalojnë te njerëzit – si koronavirusët.

Shkencëtarët i kanë identifikuar macet civet si një “host të ndërmjetëm” të mundshëm për shpërthime vdekjeprurëse – në mënyrë të ngjashme me atë që ekspertët mendojnë se lakuriqët e natës mund të kenë transmetuar Covid-19 te njerëzit. Kjo lidhet me faktin se ekspertët kanë zbuluar se civet-ët ishin pritësi kryesor ndërmjetës për transmetimin e virusit të SARS-it (Severe Acute Respiratory Syndrome) te njerëzit gjatë një shpërthimi në Kinë.

Në janar të vitit 2004, autoritetet kineze madje urdhëruan asgjësimin masiv të mijëra civet-ëve, të cilët konsideroheshin një delikatesë në vende si Hong Kongu, për të parandaluar përhapjen e mëtejshme të shpërthimit. /PiranjatNews/

Galeria fotografike (

)