Përshkoi Australinë me skuter pa motor, 57-vjeçari përfundon aventurën epike pas 4,500 kilometrash

Një britanik 57-vjeçar ka përfunduar një udhëtim spektakolar prej rreth 4,506 kilometrash, përmes Australisë, duke përshkuar vendin nga perëndimi në lindje me një skuter tradicional pa motor elektrik. Bob Brown, nga Saltash në Cornwall të Anglisë, e nisi aventurën në muajin korrik, duke u nisur nga Perth, ndërsa pas më shumë se një muaji udhëtim mbërriti në Sydney, ku përfundoi sfidën të hënën.

Qëllimi i tij nuk ishte vetëm të përshkonte Australinë, por edhe të vendoste dy rekorde të mundshme në Guinness World Records. Brown synon të bëhet personi më i shpejtë që përshkon Australinë me skuter dhe njëkohësisht personi i parë që ka përshkuar të njëjtën rrugë në tri mënyra të ndryshme: duke vrapuar, me biçikletë dhe me skuter. “Pas një jete të mbushur me aventura, në moshën 57-vjeçare doja një tjetër aventurë epike, para se të bëhesha shumë i vjetër”, tha Brown.

Australia nuk është një territor i panjohur për të. Në vitin 2001, Brown u bë britaniku i parë që vrapoi përmes Australisë, duke përshkuar rreth 3,000 milje në vetëm 60 ditë. Dy vite më vonë, në vitin 2003, ai realizoi të njëjtën aventurë me biçikletë, duke u bërë personi i parë që kishte përshkuar kontinentin australian si me vrap, ashtu edhe me biçikletë. Këtë herë, aventura kishte edhe një qëllim bamirësie. Brown synonte të mblidhte 5,000 paund për tri organizata: Macmillan Cancer Support, St Luke’s Hospice dhe Children’s Hospice South West.

Ai gjithashtu dëshironte të përcillte një mesazh për të rinjtë, duke i nxitur ata të largohen nga ekranet dhe pajisjet elektronike dhe të kërkojnë më shumë aventura në natyrë. Sfida, megjithatë, nuk ishte aspak e lehtë. Gjatë udhëtimit Brown pësoi disa incidente. Në ditën e pestë, një automjet që po kalonte pranë tij i preku pasqyrën anësore, duke bërë që ai të humbiste kontrollin dhe të rrëshqiste në anë të rrugës.

Incidenti më serioz ndodhi pikërisht në ditën e fundit. Kur i kishin mbetur vetëm 20 kilometra, timoni i skuterit u thye teksa zbriste një kodër të pjerrët, duke shkaktuar një rrëzim të fortë.

Pavarësisht dëmtimeve dhe vështirësive gjatë rrugës, Brown arriti ta përfundojë udhëtimin në kohën e jashtëzakonshme prej 31 ditësh, 4 orësh dhe 10 minutash. Ai tashmë ka dorëzuar dokumentacionin e nevojshëm te Guinness World Records dhe pret vendimin zyrtar për të mësuar nëse aventura e tij do të njihet si rekord botëror.