Protesta kundër qeverisë Rama hyn sot në ditën e saj të 57-të. Qytetarët pritet të mblidhen sërish në mbr&eu...
LIFESTYLE
Profesoresha i ‘shiti’ dashurinë 72-vjeçarit dhe i mori 1.3 milion dollarë për të blerë një shtëpi luksoze
PiranjatPërditësimi i fundit 13 Prill 2026, 19:54
Djali i Frank Watrous Hamilton akuzon profesoreshën e Psikiatrisë në Universitetin e Kolumbias, Maria Karagiorgou, se i ka mashtruar të atin e tij të dobët me 1.3 milion dollarë për të blerë një shtëpi në Greqi. Sipas padisë së ngritur në gjykatën e Manhattanit, 72-vjeçari Hamilton ishte “i prekshëm” pas një goditjeje në tru në vitin 2018, “e cila pati një efekt dobësues në shëndetin e tij mendor dhe fizik”.
Edhe pse është e paqartë se si Maria Karagiorgou u takua me Hamiltonin, djali i tij e akuzon atë se e ka kuptuar se “ai ishte një burrë i dobët, i prekshëm dhe i çorientuar, i moshuar” përpara se të fillonte një marrëdhënie intime kur u takuan në vitin 2021 ose 2022.
“Dr. Karagiorgou u integrua në jetën e Hamiltonit për të shfrytëzuar gjendjen e tij të dobësuar, për të fituar besimin e tij dhe për ta manipuluar atë, me qëllim që t’i merrte pasuritë e tij për përfitimin e saj”, pretendon familja e 72-vjeçarit, sipas New York Post.
Hamilton, baba i dy fëmijëve, kishte një karrierë gati 50-vjeçare në Wall Street dhe shërbeu si drejtues në firmën e shërbimeve financiare Promontory Interfinancial Network.
“Kurthi” i dyshuar i diferencës në moshë u krijua, sipas familjes së 72-vjeçarit, me Karagiorgou, atëherë 57 vjeç, që fluturoi nga Nju Jorku në Florida për të kaluar Festën e Falënderimeve, Krishtlindjet, Vitin e Ri, Pashkët dhe dy ditëlindjet e saj me të. Gjatë disa prej këtyre tubimeve shoqërore, Hamilton i referohej Karagiorgou-t si të fejuarën ose gruan e tij. Në të njëjtën kohë, pretendon familja e 72-vjeçarit, e dyshuara si "kërkuese ari" kishte në sy një shtëpi në Athinë dhe i kërkonte vazhdimisht Hamiltonit të paguante faturën.
Sipas padisë, megjithëse kishte një marrëveshje të pathënë për të blerë shtëpinë në emrat e të dyve, Karagiorgou ishte e listuar si pronare e vetme përpara se ajo më pas të ndërpriste kontaktin me Hamiltonin.
Transfertat bankare u zbuluan nga një avokat i familjes Hamilton pas vdekjes së 72-vjeçarit më 26 janar 2025.
Familja e Hamiltonit akuzon profesoren e Columbias për "shfrytëzimin e qëllimshëm të dobësive të Hamiltonit dhe përdorimin e pozicionit të saj të besimit dhe sigurisë për ta ndikuar atë".
Sipas New York Post, Karagiorgou është Drejtoreshë e Asociuar e Divizionit të Gjenetikës Mjekësore në Departamentin e Psikiatrisë dhe duket se zotëron një shtëpi prej 1.7 milion dollarësh në lagjen luksoze Riverdale të Bronxit. Brenda pak muajsh, Hamilton dërgoi fillimisht 100,000 dollarë më 4 prill 2022, dhe më pas 1.2 milion dollarë më 18 maj 2022, për blerjen e shtëpisë prej 1.3 milion dollarësh në Athinë. /PiranjatNews/
