Shefi e dënoi se s’kapi objektivat e punës, e reja përfundon në spital

Një 29-vjeçare në Kinë ka përfunduar në spital pasi u detyrua nga shefi i saj të kryente 200 squats si ndëshkim për mosrealizimin e objektivave të punës.

Gruaja, e identifikuar me mbiemrin Yang, punonte prej qershorit si konsulente financiare në një kompani që ofron asistencë për kredi në Hangzhou, në provincën Zhejiang. Sipas raportimeve, punonjësit duhej të kryenin çdo ditë 200 telefonata, të ftonin një klient dhe të siguronin të paktën një klient potencial të gatshëm për bashkëpunim.

Më 28 korrik, Yang nuk arriti të përmbushte dy prej objektivave. Menaxheri i saj, i identifikuar me mbiemrin Zhang, i dha dy alternativa: të kryente 200 squats ose të paguante 50 juanë për secilin objektiv të parealizuar.

Për shkak të vështirësive financiare, 29-vjeçarja zgjodhi të kryente ushtrimet. Ajo filmoi veten duke i bërë në seri të ndryshme brenda dhe përreth zyrës, si provë për mbikëqyrësin.

Pas përfundimit të përsëritjeve të fundit, Yang mezi qëndronte në këmbë dhe kishte vështirësi në ecje. Ajo thotë se kishte dhimbje të forta, por nuk kërkoi menjëherë ndihmë mjekësore, pasi nuk kishte mundësi financiare për trajtimin.

Pesë ditë më vonë, pasi vuri re se urina i ishte errësuar ndjeshëm, ajo shkoi në spital. Mjekët e diagnostikuan me rabdomiolizë, një gjendje serioze në të cilën dëmtohen me shpejtësi muskujt dhe substancat e çliruara prej tyre kalojnë në qarkullimin e gjakut, duke rrezikuar edhe funksionin e veshkave.

Niveli i kreatinë-kinazës në gjakun e saj arriti rreth 16 mijë U/L, duke treguar dëmtim të rëndë të muskujve. Fatmirësisht, 29-vjeçarja nuk pësoi dëmtim të veshkave dhe gjendja e saj nuk përparoi deri në dështim të tyre.