Si t’i thani fiqtë e në shtëpi dhe t’i ruani deri në 10 muaj

Fundi i verës është një nga periudhat më të përshtatshme për të tharë fiqtë dhe për t’i ruajtur për muajt e ardhshëm. Përzgjedhja e frutave dhe largimi i plotë i lagështisë janë elementët kryesorë për një ruajtje të mirë.

Fiqtë duhet të jenë të pjekur, por në gjendje të mirë. Këshillohet që të mblidhen herët në mëngjes, përpara se të nxehen nga dielli. Më pas pastrohen me një pecetë të lagur ose shpëlahen dhe thahen me kujdes.

Përpara tharjes, fiqtë mund të priten për së gjati në mes, pa i ndarë plotësisht dy pjesët. Fiqtë më të vegjël dhe të fortë mund të lihen të plotë, duke u bërë një ose dy vrima të vogla për të lehtësuar largimin e lagështisë.

Fiqtë vendosen në një tepsi të mbuluar me letër pjekjeje, me pjesën e prerë të kthyer lart. Mbi ta këshillohet vendosja e një rrjete ushqimore për t’i mbrojtur nga insektet.

Ata lihen në diell për të paktën tri ditë dhe kthehen çdo pesë deri në gjashtë orë, në mënyrë që të thahen në mënyrë të njëtrajtshme. Gjatë natës duhet të futen brenda, pasi lagështia mund të ndikojë në procesin e tharjes.

Pas rreth tri ditësh, fiqtë duhet të kenë humbur pjesën më të madhe të lagështisë. Në këtë fazë mund të konsumohen të tharë ose të mbushen me arra. Për të përfunduar procesin, mund të futen në furrë për rreth 10 minuta në temperaturën 70-80 gradë Celsius, duke e mbajtur derën e furrës pak të hapur.

Pas tharjes së plotë, fiqtë vendosen në kavanoza qelqi që mbyllen hermetikisht. Kavanozat duhet të ruhen në një vend të freskët, të thatë dhe larg dritës. Në këto kushte, fiqtë e tharë mund të qëndrojnë për rreth 8 deri në 10 muaj.

Në kavanoz mund të shtohen edhe gjethe dafine ose rigon i tharë. Një tjetër metodë është vendosja e fiqve të tharë në ngrirje për 72 orë dhe më pas kthimi i tyre në temperaturën e ambientit, për të kufizuar rrezikun nga insektet.

Gjatë ruajtjes mund të shfaqet një shtresë e bardhë në sipërfaqen e fiqve. Kjo nuk nënkupton domosdoshmërisht se janë prishur, pasi mund të jetë rezultat i kristalizimit natyral të sheqernave. Megjithatë, nëse shfaqin myk, kanë sipërfaqe të rrëshqitshme ose erë të fortë të thartë, nuk duhet të konsumohen.