Ushqeu arushën nga dritarja e makinës, turisti sulmohet rëndë dhe gjobitet nga shteti

Një turist bullgar ka përfunduar në spital pasi u sulmua nga një arushë në zonën e digës Vidraru, në rrugën Transfăgărășan të Rumanisë. Sipas autoriteteve, kafsha e egër ndodhej pranë rrugës së bashku me këlyshin e saj kur iu afrua automjetit të turistit.

Dyshohet se burri ka ushqyer arushën direkt nga dritarja e makinës, veprim që e bëri kafshën të afrohej dhe më pas ta sulmonte. Viktima, rreth 46 vjeç, u kafshua në parakrahun e majtë dhe mori ndihmën e parë nga personeli i sigurisë në digën Vidraru, përpara se të transportohej në spital nga një ekip i urgjencës.

Pas incidentit, xhandarmëria rumune e gjobiti turistin me 20 mijë lei (4 mijë euro) për ushqimin e kafshëve të egra, në përputhje me legjislacionin për mbrojtjen e fondit të gjuetisë dhe faunës së egër.

Autoritetet u bëjnë thirrje turistëve të mos ushqejnë dhe të mos afrohen te arinjtë, pasi sjellje të tilla mund të çojnë në incidente të rrezikshme si për njerëzit, ashtu edhe për kafshët.