VIDEO/ Familja me 9 anëtarë arratiset me vrap nga restoranti me skemën “ha dhe ik pa paguar”

Një familje e tërë, e cilësuar si "profesioniste" e skemës së njohur "ha dhe ik pa paguar", është filmuar nga kamerat e sigurisë duke u larguar nga një restorant turk në Hatfield, Hertfordshire të Britanisë së Madhe, pa shlyer një faturë prej 180 eurosh.

Grupi, i përbërë nga pesë të rritur dhe katër fëmijë, konsumoi një sërë gatimesh me mish, brinjë qengji, birra dhe pije freskuese në restorantin "Turkish Kitchen", përpara se të hipte në një furgon të bardhë dhe të zhdukej.

Sipas menaxherit të restorantit, Klaus Ademi, familja dukej krejtësisht normale dhe nuk ngjalli asnjë dyshim, pasi nuk bëri porosi të tepruara. Kur erdhi momenti për të paguar, ata i thanë stafit se do ta shlyenin faturën "brenda një minute".

Pamjet e kamerave të sigurisë tregojnë se largimi i tyre ishte i organizuar. Anëtarët e familjes nisën të dilnin nga restoranti njëri pas tjetrit, duke ecur qetësisht drejt anës tjetër të rrugës, çka sipas përgjegjësit të restorantit ishte pjesë e një plani të mirëorganizuar. I fundit që mbeti në tavolinë ishte një burrë i veshur me një bluzë blu. Pasi mbeti vetëm, ai u ngrit dhe u largua edhe vetë, për t'u hipur më pas në një furgon të bardhë të parkuar menjëherë jashtë hyrjes së restorantit.

Stafi e kuptoi largimin e klientit të fundit, por derisa punonjësit verifikuan nëse dikush nga grupi kishte paguar faturën, furgoni ishte zhdukur.

Klaus Ademi, i cili punon në biznesin familjar prej shtatë vitesh, publikoi pamjet e kamerave të sigurisë në rrjetet sociale për të paralajmëruar bizneset e tjera të zonës. Ai ka bërë të ditur gjithashtu se do ta denoncojë ngjarjen në polici.

"Nuk na kishte ndodhur kurrë diçka e tillë", tha menaxheri i restorantit. "Ky është një biznes familjar dhe kjo humbje është e konsiderueshme, sidomos në një periudhë kur restorantet po luftojnë për të mbijetuar." /PiranjatNews/