VIDEO/ Fund i trishtueshëm për qenushin që jetoi me tufën e ujqërve në pyll

Një fund tepër i trishtueshëm rezervuan fati dhe natyra për marrëdhënien unike mes një tufe ujqërish dhe një këlyshi të bardhë, histori që ishte bërë e njohur më parë nga mediat greke. 

Këlyshi i bardhë, i cili jetonte mes një tufe ujqërish në një zonë të Maqedonisë Qendrore, ishte pranuar nga ujqërit, të cilët i mësonin ku të shkonte për të pirë ujë dhe i sillnin ushqim, si kocka. Këtë histori e kishte dokumentuar për qëllime kërkimore doktori i Zoologjisë në Universitetin "Aristoteli" të Selanikut, Teodoros Kominos, përmes një postimi në rrjetet sociale. Fatkeqësisht, këlyshi ka ngordhur.

"Fundi i një historie unike. Këlyshi i bardhë nuk jeton më! Fatkeqësisht, historia e tij mori fund", shkroi ai, duke e shoqëruar postimin me një video ku shihet qartë gjendja e rëndë dhe rraskapitja e këlyshit të vogël.

Në video duket se, ndërsa këlyshi është i shtrirë dhe i pafuqishëm, një nga ujqërit e rinj të tufës i afrohet dhe përpiqet ta nxisë të luajë me të, por këlyshi i bardhë nuk ka më forcë t'i përgjigjet.

Sipas Kominos, vetëm pak ditë më parë këlyshi kishte shfaqur shenja shqetësuese për gjendjen e tij shëndetësore. Ai ishte shumë i dobësuar, vuante nga diarre e fortë dhe nuk kishte asnjë dëshirë të lëvizte. Mëngjesin e sotëm, ai u gjet i ngordhur.

 «Për të paktën 40 ditë nga regjistrimi ynë i parë – dhe me shumë gjasë për më shumë se 50 ditë në total – këlyshi i vogël jetoi së bashku me një familje të egër ujqërish, duke na dhuruar një nga vëzhgimet më të pazakonta të sjelljes që kemi dokumentuar gjatë gjithë këtyre viteve. Deri gjashtë ditë më parë, këlyshi dukej se ishte në gjendje shumë të mirë. Luante me këlyshët e ujqërve, ndiqte ujkonjën duke kërkuar minj dhe karkaleca, dhe në përgjithësi lëvizte normalisht së bashku me tufën.

Megjithatë, tre ditë më parë pamja e tij ishte krejtësisht ndryshe. E regjistruam dukshëm të rraskapitur, me diarre të rëndë dhe pothuajse pa asnjë dëshirë për të lëvizur. Gjithçka tregon se kishte shfaqur një problem serioz gastrointestinal, i cili mund të ishte shkaktuar nga arsye të ndryshme, si një infeksion parazitar, një infeksion bakterial, konsumimi i ushqimit të prishur apo edhe stresi i përshtatjes në një mjedis të egër. Megjithatë, pa analizat e nevojshme, nuk mund të dimë shkakun e saktë të vdekjes së tij dhe çdo vlerësim do të ishte thjesht një supozim.

Këlyshi u izolua në një pjesë të zonës dhe nuk u ngrit më. Sot në mëngjes e gjetëm të ngordhur, pikërisht në të njëjtin vend», shkroi zoti Kominos, i cili e mbylli postimin me fjalët: «Udhëtim të mbarë, i vogli…». /PiranjatNews/