VIDEO/ Jahti 8 milionë euro fundoset, vetëm katër ditë pasi iu dorëzua pronarit

Një jaht me vlerë më shumë se 8 milionë euro është fundosur në ujërat pranë Porto Cervo, në Sardenjë, vetëm katër ditë pasi iu dorëzua pronarit të ri. Të 14 personat që ndodheshin në bord, përfshirë anëtarët e ekuipazhit dhe pasagjerët, u shpëtuan dhe nuk raportohet të kenë pësuar lëndime.

Jahti “Angiola II”, rreth 30 metra i gjatë, pësoi probleme serioze mbrëmjen e së martës, më 11 gusht, ndërsa lundronte pranë Capo Ferro, në zonën e Costa Smeralda.

Sipas vlerësimeve paraprake të autoriteteve, incidenti nisi në dhomën e motorëve, ku u regjistrua një defekt teknik dhe më pas shpërtheu një zjarr i vogël.

Flakët u vunë shpejt nën kontroll, por ndërkohë uji filloi të depërtonte në brendësi të jahtit. Anija humbi gradualisht aftësinë për të qëndruar në sipërfaqe, u zhyt pjesërisht dhe më pas u anua në njërën anë, duke përfunduar në një thellësi prej rreth shtatë metrash. Shkaqet e sakta të incidentit janë ende duke u hetuar.

14 persona në bord

Në momentin e incidentit, në bordin e “Angiola II” ndodheshin gjithsej 14 persona.

12 prej tyre u transferuan në një tjetër anije që ndodhej pranë vendngjarjes. Ndërkohë, pronari i jahtit, një biznesmen italian, dhe një mik i tij thuhet se qëndruan në “Angiola II” deri në mbërritjen e ekipeve të shpëtimit.

Nis operacioni për nxjerrjen e jahtit

Pronari ka kontaktuar tashmë një kompani të specializuar për nxjerrjen e jahtit nga deti.

Për operacionin pritet të përdoret një vinç lundrues me kapacitet ngritjeje prej rreth 200 tonësh. Plani është që jahti të nxirret nga uji, të transportohet në tokë dhe t’i nënshtrohet riparimeve të nevojshme për t’u rikthyer në gjendje lundrimi.

Sipas mediave italiane, “Angiola II” nuk ishte një jaht i ri. Ai ishte ndërtuar dhe hedhur në ujë në vitin 2020 dhe gjatë viteve kishte ndërruar disa herë pronarë. /PiranjatNews/