VIDEO/ Kafsha gjigante fluturon burrin disa metra në ajër si kukull lecke

Ky është momenti tronditës kur një bizon i tërbuar sulmon një gjysh dhe e hedh rreth 2.5 metra në ajër, si të ishte një kukull prej lecke. Pamjet tregojnë kafshën gjigante duke kullotur pranë një tavoline pikniku në Parkun Kombëtar Yellowstone, në shtetin e Wyoming-ut. Një burrë i moshuar dhe nipi i tij shihen duke ecur rreth 90 metra larg bizonit.

Ata ndalojnë për të bërë fotografi, ndërsa kafsha rrotullohet në pluhur. Më pas, bizoni ngrihet në këmbë dhe turistët largohen edhe më shumë prej tij.

Pasi një kamion kalon pranë, kafsha acarohet dhe vërsulet drejt pemëve, ku gjyshi ishte fshehur. Bizoni kalon me vrull përmes pyllit, ndërsa burri përpiqet të largohet i tmerruar.

Në një moment duket sikur kafsha e shfryn zemërimin e saj mbi një pemë të vogël dhe krijohet përshtypja se burri ia ka dalë të shpëtojë.

Por bizoni i vihet sërish pas. Këtë herë arrin ta kapë vizitorin.

Kafsha e godet me një përplasje të fuqishme me kokë, duke e hedhur burrin lart në ajër.

 Burri përmbyset në ajër dhe bie me forcë në tokë, disa metra më tej.

Sipas raportimeve, ai pësoi lëndime të rënda nga sulmi dhe u dërgua me urgjencë në spital.

Sulmi u filmua rastësisht nga një fotograf, i cili ndodhej në park për të fotografuar kafshët.

Mike MacLeod tha për Cowboy State Daily:

"Thjesht po përpiqesha të filmoja pamje sa më dramatike të atij bizoni, i cili po sillej në mënyrë të pazakontë. Kjo ngjarje ma ndryshoi krejtësisht perceptimin për atë që mund të presësh nga këto kafshë në këtë periudhë të vitit, sepse nuk do ta kisha imagjinuar kurrë që mund të ndodhte diçka e tillë."

Mike tha se fillimisht bizoni u vërsul drejt një grupi fëmijësh, të cilët arritën të largoheshin pa u lënduar, përpara se të kthente vëmendjen te gjyshi.

Fotografi, i cili më parë kishte punuar si fotograf ushtarak në zona lufte, tha se mund ta shihte qartë se kafsha po afrohej me shpejtësi.

Sipas tij, viktima dhe nipi i tij ndodheshin në një distancë të sigurt nga bizoni përpara se ai të sulmonte.

Mike tregoi se kafsha gjigante e kapi burrin duke e goditur me bririn e majtë në pjesën e ijës, përpara se ta hidhte lart në ajër.

"Ai bëri një rrotullim të plotë në ajër dhe ra anash. Bizoni ishte të paktën 1.8 metra i lartë, ndërsa burri u hodh disa metra mbi të," shpjegoi ai.

I frikësuar se kafsha do ta sulmonte sërish burrin ndërsa ai ishte i shtrirë në tokë, Mike ndaloi xhirimin dhe vrapoi drejt bizonit, duke bërtitur me sa fuqi kishte.

"M'u desh t'i tërhiqja vëmendjen bizonit. Kisha shumë frikë se do ta shponte me brirë burrin që ishte në tokë. Ndaj ndalova së filmuari, vrapova drejt tij, bërtita me të madhe dhe u përpoqa të dukesha sa më i madh dhe kërcënues," tha ai.

Edhe disa persona të tjerë që ndodheshin aty iu bashkuan, duke bërë që kafsha të largohej me vrap.

Pasi bizoni u largua, dëshmitarët shkuan për t'i dhënë ndihmën e parë të plagosurit, ndërsa ekipet e emergjencës së Parkut Kombëtar Yellowstone mbërritën me shpejtësi në vendngjarje.

Mike tha se nuk vuri re plagë të jashtme tek burri, por ai ankohej për dhimbje në këmbë dhe në ijë, aty ku ishte përplasur në tokë.

Deri më tani nuk është dhënë asnjë përditësim mbi gjendjen shëndetësore të të moshuarit.

Ngjarja ndodh vetëm pak kohë pasi një 12-vjeçar mbeti i plagosur nga një sulm bizoni pranë zonës Mud Volcano, në veri të Fishing Bridge, gjithashtu brenda Parkut Kombëtar Yellowstone. /PiranjatNews/