VIDEO/ Rruga spirale që të krijon idenë e ngjitjes në qiell!

Një nga veprat rrugore më mbresëlënëse të Kinës është kthyer në një atraksion turistik, pasi një rrugë e ngritur me formë spirale në jugperëndim të vendit krijon një ndjesi mahnitëse, sikur drejtuesit e automjeteve po ngjiten gradualisht drejt qiellit.

Bëhet fjalë për urën Sujiaba, në qytetin Chongqing, një strukturë me dizajn të veçantë spiral dhe kthesa të buta, e cila në disa pika arrin rreth 72 metra mbi tokë.

Lartësia e saj është e barabartë me një ndërtesë me më shumë se 20 kate, duke krijuar një pamje spektakolare si për ata që e përshkojnë me makinë, ashtu edhe për njerëzit që e shohin nga toka.

Dizajni i pazakontë i saj nuk është thjesht një zgjedhje arkitekturore. Struktura në formë spirale i mundëson urës të lidhë urën Caiyuanba mbi lumin Yangtze me rrugën Haitong, e cila ndodhet në një lartësi shumë më të ulët.

Në këtë mënyrë, kjo vepër infrastrukturore përballet me një nga sfidat kryesore të Chongqing-ut: diferencat e mëdha në lartësi, që karakterizojnë terrenin e qytetit.

Drejtimi i automjetit mbi urën Sujiaba të jep ndjesinë e një ngjitjeje të pandërprerë, ndërsa rruga ndjek trajektoren e saj karakteristike në formë spiraleje.

Pamja u kujton shumë njerëzve një slitë gjigante rulore në një park argëtimi, megjithëse në të vërtetë bëhet fjalë për një rrugë të zakonshme, e cila përdoret çdo ditë nga automjetet. Kjo strukturë mbresëlënëse tashmë ka tërhequr edhe interesin e turistëve.

Në afërsi të saj janë krijuar një pikë vrojtimi në ajër të hapur dhe një shteg panoramik, nga ku banorët dhe vizitorët mund të vëzhgojnë ndërtimin kompleks në disa nivele dhe të shijojnë pamjen drejt horizontit të Chongqing-ut. /PiranjatNews/