“Sulm i mirëorganizuar ndaj Bashkisë Memaliaj”/ Kryebashkiaku: Po na bllokojnë të gjitha fondet

Një përplasje e fortë politike po zhvillohet rreth Bashkisë Memaliaj. Kryetari Albert Malaj denoncon atë që e cilëson si një “sulm të mirëorganizuar” ndaj bashkisë, duke ngritur shqetësimin se po synohet shkrirja e saj në kuadër të Reformës Administrativo-Territoriale.

Sipas Malajt, kryeministri Edi Rama ka thirrur në takim kryetarët e bashkive të propozuara për t’u shkrirë, ndërsa Bashkia Memaliaj ndodhet në qendër të kësaj situate.

Malaj akuzon gjithashtu Këshillin Bashkiak të Memaliajt, të kryesuar nga përfaqësues të Partisë Socialiste, se prej rreth dy muajsh ka bllokuar fondet e bashkisë, duke penguar sipas tij investimet dhe zhvillimin e Memaliajt.

Në reagimin e tij, kryebashkiaku thotë se situata është përshkallëzuar dhe se bllokimi i fondeve po ndikon drejtpërdrejt në punën e bashkisë dhe projektet e parashikuara për qytetin.

Malaj u bën thirrje qytetarëve të Memaliajt të dalin në protestë, duke kërkuar mbështetje për ruajtjen e Bashkisë Memaliaj si njësi më vete.