45 ditë revoltë! Nis mbledhja e protestuesve në sheshin “Skënderbej”, shqiptarët kërkojnë dorëheqjen e Ramës: Ju erdhi fundi!

Protesta qytetare kundër qeverisë hyn sot në ditën e saj të 45-të, ndërsa qytetarët kanë nisur të grumbullohen në sheshin “Skënderbej”, për t’i dhënë vijimësi marshimit të përnatshëm që prej më shumë se një muaji kërkon dorëheqjen e kryeministrit Edi Rama.

Me pankarta, flamuj kombëtarë dhe thirrje kundër qeverisë, protestuesit po mblidhen në qendër të Tiranës, nga ku pritet të nisin marshimin drejt godinës së Kryeministrisë.

Edhe këtë mbrëmje nuk mungojnë sloganet që janë kthyer në simbol të kësaj lëvizjeje qytetare. “Rama jep dorëheqjen”, “Ju erdhi fundi” dhe “Shqipëria nuk është në shitje” janë disa nga thirrjet që dëgjohen në shesh, ndërsa organizatorët kanë paralajmëruar vijimin e protestave deri në plotësimin e kërkesave të tyre.

Protesta, e cila nisi fillimisht si reagim ndaj zhvillimeve për Zvërnecin, është shndërruar në një revoltë më të gjerë kundër qeverisë dhe klasës politike, me kërkesën kryesore për largimin e kryeministrit Edi Rama.