Arkivoli në protestë/ Berisha: Qytetarët i përgatitën Ramës funeralin politik!

Kryedemokrati, Sali Berisha, e cilësoi protestën e zhvilluar një natë më parë si një mesazh të fortë kundër Edi Ramës.

Duke iu referuar simbolikës së arkivolit të vendosur gjatë tubimit, Berisha deklaroi se qytetarët i kishin përgatitur Ramës “funeralin politik”.

Sipas Berishës, Rama po injoron hapur kërkesat e protestuesve dhe po anatemon protestën. Ai thotë se Rama duhet të japë llogari dhe të dorëhiqet.

“Ditën në të cilën shqiptarët përmbysën dhe zvarritën shtatoren e Enver Hoxhës dhe së bashku me të përmbysën kultin më të keq në të gjithë historinë e tyre. Mbrëmë, qindra mijëra protestues përmbysën, para zyrave të tij, shtatoren e narkodiktatorit Edi Rama dhe i organizuan, me simbolizma, funeralin e tij politik.

Sot në vend të dorëheqjes, Edi Rama urdhëroi përsëri, të provojë apo të reklamojë suksese dhe të anatemojë protestën e qytetarëve. Ai foli për një korrje të zezë dhe ujërat që rrjedhin ndër të.

Në të vërtetë mbrëmë në Tiranë ishte deti i ujërave të pastërta të popullit shqiptar që kërkon largimin e kreut të meduzës dhe qeverisë së tij kriminale, organizatës kriminale. Ndaj dhe një herë, kërkoj në emër të Partisë Demokratike, dorëheqjen e menjëhershme të Edi Ramës dhe plotësimin e pesë kërkesave të protestuesve, të cilat janë kërkesa njëkohësisht të Partisë Demokratike”,- shprehet Berisha ndër të tjera.