Studentët kanë marshuar sot në rrugët e Tiranës, ndërsa janë ndalur te Fakulteti i Ekonomikut, ku iu kanë bërë...
POLITIKE
Bardhi: Qeveria po mashtron Brukselin, të zhbëhen ndryshimet për zonat e mbrojtura
PiranjatPërditësimi i fundit 1 September 2026, 15:13
Në një postim në rrjete sociale, kreu i Grupit Parlamentar të PD-së, Gazment Bardhi, akuzon qeverinë se po tenton të mashtrojë Brukselin me një projekt-VKM për vlerësimin mjedisor, ndërsa ndryshimet e vitit 2024 në ligjin për zonat e mbrojtura mbeten në fuqi.
Bardhi thotë se VKM-ja nuk zgjidh problemin dhe nuk mund të paraqitet si adresim i shqetësimeve të Bashkimit Europian.
Ai i referohet rezolutës së Parlamentit Europian, e cila kërkon zhbërjen e ndryshimeve që lejojnë ndërtime në zona ekologjikisht të ndjeshme.
Kreu i grupit parlamentar të PD-së thekson se opozita ka depozituar në Kuvend nismën për shfuqizimin e këtyre ndryshimeve.
Bardhi i kërkon qeverisë të rikthejë ligjin në standardet europiane ose ta çojë çështjen në referendum.
Reagimi
Qeveria po përpiqet të mashtrojë Brukselin me një VKM mjedisor, ndërsa ndryshimet famëkeqe në ligjin 21/2024, që hapi zonat e mbrojtura për ndërtime, nuk i prek.
Projekt VKM-ja, e nxjerrë së fundmi për konsultim, përcakton vetëm se si duhet të bëhet vlerësimi mjedisor kur një projekt ndërtimi mund të ndikojë një zonë që gëzon mbrojtje. Ky mund të jetë një filtër shtesë, por nuk mund t’i shitet Bashkimit Europian si adresim i shqetësimit, ndërkohë që ligji që krijoi problemin mbetet i paprekur.
Në rezolutën e Parlamentit Europian thuhet shprehimisht se “Parlamenti Europian shpreh shqetësim serioz për ndryshimet në Ligjin për Zonat e Mbrojtura, të cilat lejojnë projekte të mëdha infrastrukturore dhe turistike në zona ekologjikisht të ndjeshme dhe kërkon që këto ndryshime ligjore të zhbëhen”.
Partia Demokratike e ka depozituar në Kuvend nismën për shfuqizimin e ndryshimeve të vitit 2024 në ligjin për zonat e mbrojtura. Kjo është edhe një nga kërkesat e qytetarëve që kanë protestuar për mbrojtjen e këtyre territoreve, por që vazhdon të injorohet nga kryeministri i betonit dhe i parave të pista.
Ose të dëgjojë shqiptarët dhe Brukselin, duke rikthyer ligjin për zonat e mbrojtura në standardet që kërkon anëtarësimi i Shqipërisë në Bashkimin Europian.
Ose rruga tjetër është ta çojë ligjin në referendum dhe t’i lërë shqiptarët të vendosin.
Kryeministra gjejmë plot. Shqipëri kemi vetëm një.
