Ipsuiç u përball dje me Leistërin në fazën 1/32 të “EFL Cup”. Anis Mehmeti ishte sërish në tribunë ...
POLITIKE
Beteja për Kuçovën nesër në KAS, Maliqi: Hajdari po mbyll mandatin në shkelje flagrante të ligjit
PiranjatPërditësimi i fundit 26 Gusht 2026, 15:00
Ish-deputeti Lefter Maliqi ka reaguar përmes një postimi në rrjetet sociale në prag të seancës së 27 gushtit në Komisionin e Ankimimeve dhe Sanksioneve (KAS), ku pritet të shqyrtohet çështja që lidhet me mandatin e kryebashkiakut të Kuçovës, Kreshnik Hajdari.
Maliqi shkruan se pret një vendim përfundimtar nga KAS, ndërsa akuzon Hajdarin se po e mbyll mandatin në kundërshtim me ligjin e dekriminalizimit. Ai e krahason rastin me atë të ish-kryebashkiakut të Vorës, Agim Kajmakut, mandati i të cilit u shpall i pavlefshëm.
Në reagimin e tij, Maliqi rendit edhe betejën e gjatë ligjore për këtë çështje, duke përmendur ankimimet në KQZ, KAS, Kolegjin Zgjedhor, SPAK dhe gjykata të ndryshme.
Reagimi i plotë:
Gjyq publik! Njoftim! Nesër, më 27, ora 11:00, në KQZ, KAS do të marrë vendimin përfundimtar për çështjen e të dënuarit, të paaftit dhe abuzuesit Hajdari, në krye të Bashkisë së grabitur të Kuçovës.
Megjithëse disa vendime KAS-i i ka marrë të drejta, nuk duhet ta paragjykoj vendimin. Por jam i bindur se do të japin një vendim në kundërshtim me ligjin e dekriminalizimit, ku Hajdari po mbyll mandatin në shkelje flagrante të ligjit. Rasti i tij është i njëjtë me atë të Kajmakut të Bashkisë Vorë, ku mandati i tij si kryetar bashkie u shpall i pavlefshëm.
U bënë pothuajse 4 vjet me ankime, kallëzime, padi kudo: në KQZ, KAS, Kolegjin Zgjedhor, SPAK, GJKKO, Gjykatën Administrative, Gjykatën e Beratit, Gjykatën e Lartë, me disa rikthime: 5 herë në KAS, 4 herë në KQZ, 3 herë në Kolegjin Zgjedhor etj.
Dhe Hajdari, me mbështetje politike, oligarkike, lobime, me taksat e qytetarëve, me ish-Prokurorin e Përgjithshëm si mbrojtës etj., vazhdon detyrën; mbrohet për tenderat korruptivë, për interesat klienteliste të Rilindjes dhe firmave të ndërtimit.
Pavarësisht vendimit të nesërm në KAS, ju siguroj se betejën ligjore, morale dhe politike do ta vazhdoj deri në fund.
Bashkinë e grabitur të Kuçovës do ta fitojmë, do t’ua kthejmë qytetarëve dhe do ta kthejmë në një kantier ndërtimi, shembull në vend.
Hajdari, si të bjerë nga detyra, do të përgjigjet dhe, sa të bjerë, të gjithë do ta shohin dhe do të dalin në pah abuzimet dhe zhvatjet. Leku i popullit, herët apo vonë, të del nga hundët!
Karrigia e dhuruar dhe e grabitur nuk gëzohet; pasojat e rënda vijnë pas!
