Biznesmeni po fluturonte me avion pranë një centrali bërthamor/ Detaje nga arrestimi i Ermal Beqirit në Francë

Detaje të reja janë zbardhur nga arrestimi i biznesmenit Ermal Beqiri në Francë. Sipas mediave franceze, Beqiri u ndalua pas një incidenti ajror pranë centralit bërthamor të Penly, në Seine-Maritime. Lejdd.fr shkruan se avioni i vogël që ai drejtonte kaloi mbi zonën e mbrojtur të centralit, duke bërë që autoritetet franceze ta shoqëronin me një mjet të Forcave Ajrore deri në aeroportin e Albertit.

Pas uljes, piloti u ndalua nga policia. Mediat franceze shkruajnë me tej se Ermal B. ishte i njohur më herët nga drejtësia franceze dhe shqiptare për çështje që lidhen me mashtrime financiare, mashtrim të organizuar dhe aktivitete të paligjshme kibernetike.

Gjatë kontrollit, policia i gjeti tre pajisje gjurmimi “AirTag” të fshehura në veshje, ndërsa hetuesit po verifikojnë rrethanat e incidentit dhe nëse ai mund të ketë vepruar nën ndikimin e një personi tjetër. Beqiri pretendoi se kishte gabuar me lartësinë e fluturimit dhe se në momentin e kalimit mbi central ishte duke folur në telefon me nënën.

Ai u gjobit me 7 mijë euro për shkeljen e hapësirës së ndaluar dhe iu dorëzua autoriteteve për procedurat e mëtejshme, përfshirë ekstradimin drejt Shqipërisë.