Një autobus i transportit publik në Tiranë është aksidentuar ditën e sotme në afërsi të gjykatës së Tiran...
POLITIKE
Blushi nga GJKKO: Procesi ndaj Metës pa transparencë, seancat duhet të transmetohen drejtpërdrejt
PiranjatPërditësimi i fundit 5 Qershor 2026, 17:51
Pas përfundimit të seancës gjyqësore ndaj Ilir Metës, Sekretari i Përgjithshëm i Partisë së Lirisë, Tedi Blushi, kritikoi vendimin e gjykatës për të mos lejuar praninë e mediave në sallë, duke e cilësuar atë një cenim të transparencës së procesit.
Blushi tha se argumenti i gjykatës, sipas të cilit publiciteti i procesit garantohet përmes pjesëmarrjes së publikut, nuk qëndron, duke qenë se kapaciteti i sallës është i kufizuar.
“Si mund të garantohet transparenca e një procesi me vetëm 30 vende në sallë, kur një pjesë e tyre janë të zëna nga gazetarët? Në fund mbeten rreth 15 persona, të cilët nuk mund të përfaqësojnë interesin e gjerë publik”, deklaroi ai.
Sipas Blushit, gjykata ka përdorur standarde të ndryshme për të argumentuar vendimet e saj. Ai pretendoi se për moslejimin e mediave në sallë janë cituar praktika të drejtësisë amerikane, ndërsa për përdorimin e të ashtuquajturit “kafaz xhami” për Ilir Metën janë marrë si referencë raste nga Rusia dhe Ukraina.
“Ka vetëm një standard që duhet të zbatohet dhe ai është Konventa Europiane për të Drejtat e Njeriut”, tha Blushi.
Sekretari i Përgjithshëm i Partisë së Lirisë ngriti gjithashtu akuza ndaj SPAK-ut, duke pretenduar se prokurorët kanë fshehur prova dhe dokumente që, sipas tij, hedhin poshtë akuzat e ngritura ndaj ish-presidentit Ilir Meta.
Ai iu referua dëshmisë së Jozef Hejsek dhe dokumenteve që lidhen me çështjen e kompanisë “McKeon Group”, duke pretenduar se këto materiale rrëzojnë një pjesë të akuzave të paraqitura nga organi i akuzës.
Blushi kërkoi që procesi gjyqësor të jetë plotësisht i hapur për publikun dhe mediat, duke argumentuar se transmetimi i drejtpërdrejtë i seancave do të ishte mënyra më e mirë për të garantuar transparencën.
“E vetmja zgjidhje mbetet që seancat të transmetohen live nga sekonda e parë deri në sekondën e fundit”, u shpreh ai.
Seanca e radhës në procesin gjyqësor ndaj Ilir Metës është caktuar të mbahet më 18 qershor.
