16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
POLITIKE
Bozdo “zbërthen” skemën korruptive: Ron Yeffet erdhi “me duar në xhepa”, qindra miliona euro kalojnë pa asnjë kontroll
PiranjatPërditësimi i fundit 15 September 2026, 15:21
Deputeti i Partisë Demokratike, Enno Bozdo ka denoncuar publikisht atë që e quajti një skemë të mirëmenduar korrupsioni dhe pastrimi parash përmes kompanisë shtetërore të ushtrisë KAYO dhe lidhjeve të saj me ortakët privatë të kryeministrit Edi Rama.
Bozdo theksoi se struktura e krijuar nga qeveria është një rast studimor i shmangies së llogaridhënies dhe kontrollit ligjor mbi paratë publike.
Sipas deputetit demokrat, skema funksionon duke i dhënë fillimisht kompanisë publike KAYO monopolin e plotë për furnizimet me infrastrukturë ushtarake në vend. Më pas, KAYO krijon pesë kompani bijë, mes të cilave edhe “TIMAK Defense”, ku shteti kujdeset qëllimisht të mbajë vetëm pakicën e aksioneve. Kjo pjesëmarrje minoritare e shtetit bëhet me synim të qartë procedurial: për të pamundësuar kontrollin e Kontrollit të Lartë të Shtetit (KLSH) dhe audituesve publikë mbi aktivitetin financiar të këtyre subjekteve.
Në qendër të kësaj afere, Bozdo vendosi shtetasin izraelit Ron Yeffet, të cilin e cilësoi si mik personal të kryeministrit Edi Rama. Deputeti sqaroi se Yeffet ka hyrë në këtë biznes strategjik pa asnjë përvojë apo pasaportë profesionale në industrinë e prodhimit të armëve, duke ardhur “me duar në xhepa” dhe pa asnjë garanci financiare apo garë të hapur publike, për të trokitur më pas te kompanitë e huaja si ato ukrainase.
Në përmbyllje të denoncimit të tij, Bozdo nxori në pah kontradiktat e thella brenda vetë kabinetit qeveritar, ku ministri deklaron se kompania prodhon dhe eksporton mjete ushtarake, ndërsa zëvendësministrja e pranon publikisht se as nuk prodhohet e as nuk eksportohet asgjë. Kjo përplasje deklaratash konfirmon sipas opozitës se qindra miliona euro të taksapaguesve shqiptarë po shkojnë në një gropë të zezë financiare, të ngritur ekskluzivisht për të ushqyer klientelën e pushtetit larg syve të publikut.
