Numri i aksidenteve rrugore në Shqipëri ka vijuar të rritet gjatë vitit 2026, duke arritur në 1,090 aksidente në periudh&eu...
POLITIKE
Brisida Shehaj i përgjigjet Ramës për gjyqin: Do më kesh përballë, asnjë hap pas
PiranjatPërditësimi i fundit 10 May 2026, 20:47
Pas publikimit të lajmit mbi vendimin e gjykatës në favor të kryeministrit Edi Rama në çështjen ndaj saj për shpifje, Brisida Shehaj ka reaguar me një deklaratë të gjatë dhe të ashpër publike.
Ish-drejtoresha e Tatimeve akuzon Ramën për propagandë, kontroll mbi drejtësinë dhe përdorim të pushtetit kundër fjalës së lirë, ndërsa thekson se beteja ligjore nuk ka përfunduar, pasi çështja ndodhet ende në apel.
Në reagimin e saj, Shehaj deklaron se akuzat e ngritura prej saj ndaj qeverisë lidhen me korrupsionin, taksën e naftës, bordin e transparencës dhe abuzimin me fondet publike, duke shtuar se koha ka provuar se ato që u cilësuan “shpifje” janë denoncime të mbështetura mbi fakte.
Ajo e cilëson “triumfin” e shpallur nga kryeministri si shenjë pasigurie politike dhe shprehet se “mund ta fitojë këtë gjyq Edi Rama, por ka humbur epokën”.
E diel. Qyeti ende fle për të harruar hallet, si të paguajë naftën, energjinë, ushqimet, si ta durojë ikjen e fëmijëve nga Shqipëria. Korrupsioni e krimi gjerbin kafen gjithë lezet nga verandat e kullave fantazmë. Por celularët e mediave bien pa pushim. Ankth, padurim. Lideri suprem ka sihariq: ka fituar një gjyq për shpifje ndaj qytetares Brisida Shehaj.
Se të kap gazi kur sheh një pushtet që ëndërron të hyjë në histori si perandori, por katandiset duke festuar si administrator pallati që fitoi sherrin për ashensorin që e ka vënë vetë të prishur.
Njerëzit mund të mos lexojnë vendime gjykatash, por jetojnë çdo ditë pasojat e një shteti që u merr frymën. Ndaj edhe nuk kam rreshtur së foluri.
Me fakte, përvojë të gjatë dhe njohje të mirë të stilit të punës së vet e kam akuzuar kryeministrin se buxheti vidhet rëndshëm, se taksa e naftës që po u merr shpirtin shqiptarëve është taksa e tij, se ata që ka ulur e ngulur në bordin e transparencës janë grabitës dhe se ai e di fare mirë këtë. Për këto, gjykata e reformës së Ramës më shpall “shpifëse”.
Dhe për këtë, Rama qysh në agim të së dielës pa lajme, u shërben redaksive të veta “triumfin” madhor për të mbushur edicionet e propagandës, si “programin me gënjeshtra” tek “Radiostacioni”.
Vetëm pushtetet e pasigurta kanë nevojë ta ekspozojnë publikisht “fitoren” ndaj fjalës së lirë, si trofe psikologjik.
Qysh nga 2022 kur nisi kjo gjueti personale e Ramës në gjykatë ndaj meje, koha provoi se ajo që u quajt “shpifje” është kusuri në shpinën e rraskapitur të shqiptarëve.
Për akcizën, u konfirmua me prova bllokimi nga anëtarë të qeverisë i vjeljes së 123 milionë eurove. Për anëtarët e bordit të transparencës (grosistët e naftës), vetë Rama ua pranoi sy më sy para pak javësh se do të shpallë koncesion të ri prej kontrabandës së shfrenuar. Madje deputeti Erion Braçe denoncoi zëshëm në Kuvend skemën. Për vjedhjen e buxhetit janë disa raporte KLSH-je dhe të vetë sistemit që kanë vënë alarmin.
Pra, le ta ndajë mendjen kryeministri para se të vijë e hëna: ose është i paaftë në mënyrë spektakolare dhe nuk kontrollon dot hajdutët e qeverisë së vet, ose është pjesë e sistemit ku grabitja është metodë qeverisjeje.
Çështjen e kam çuar në apel dhe deri në verdiktin final do të pres drejtësinë. Edhe atë që e kontrollon vetë lideri suprem. E nëse sërish vendosin kundra meje jam e qetë, sepse mund ta fitojë këtë gjyq Edi Rama, por ka humbur epokën.
Edhe po t’i fitojë të gjitha çështjet ndaj fjalës së lirë në sallat e gjyqeve, s’ka se si fiton gjyqin me faktet dhe historinë.
Tragjikomike kur etja e tij për t’u dukur gjigand, përfundon në pasiguri influenceri që poston “story” për reputacionin e vet.
Koha, kjo zonjë e rëndë, e pagabueshme, madamë e duruar e ka nënshkruar verdiktin se pushteti nuk i mbijeton gjatë momentit kur populli nuk e ka më frikë, por e tall si meme me eskortë.
Megjithëse pushteti je ti. E në njëjës duhet të të drejtohem. Sepse shërbëtorët e tu mund të mos më njohin. Por ti po!
Ti e di shumë mirë se nuk lodhem e ndalem. Nuk më tut as propaganda e as turma e oborrtarëve që jetojnë duke duartrokitur frikën tënde. Edhe pas kësaj, ti dhe sistemi yt do të më keni përballë. Asnjë milimetër anash. Pas kurrë!
