Celibashi ju jep "Flamingove" formularët: Mbledhim firma për të korrigjuar me referendum ligjin për zonat e mbrojtura

Në një seancë publike të zhvilluar në Komisionin Qendror të Zgjedhjeve (KQZ), është shqyrtuar kërkesa e një grupi nismëtarësh për nisjen e procedurave të referendumit të përgjithshëm që synon shfuqizimin e ligjit nr. 21/2024 "Për disa shtesa dhe ndryshime në ligjin për zonat e mbrojtura".

Gjatë fjalës së tij, juristi i grupit nismëtar, Dhimitër Zguro, parashtroi arsyet se pse 12 qytetarët e përfshirë në lëvizjen e njohur si "Revolucioni i Flamingove" i janë drejtuar KQZ-së për të kërkuar fletët tip për mbledhjen e nënshkrimeve.

"Kjo kërkesë vjen si pasojë e vetëdijes për rrezikun që i kanoset trashëgimisë dhe habitateve natyrore nga ky ligj, i cili lejon ndërtimin e infrastrukturës së turizmit të ekselencës pa asnjë lloj kriteri. Hartimi i këtij ligji vjen në kundërshtim me direktivat e Bashkimit Evropian, Konventën e Bernës, Konventën e Ramsarit dhe akte të tjera ndërkombëtare të ratifikuara. Gjykata Kushtetuese ka dështuar të përmbushë misionin e saj për shfuqizimin e këtij ligji, ndërkohë që shfuqizimi i tij përbën një nga kriteret mbyllëse (closing benchmark) për kapitullin 27 të negociatave për anëtarësimin në BE," u shpreh Zguro.

Lidhur me afatet e mbledhjes së firmave, juristi Zguro kërkoi një kohëzgjatje gjashtëmujore, duke marrë parasysh edhe kufizimet ligjore të fundvitit:

"Duke mbajtur në konsideratë se periudha e dhjetorit është kohë e ndaluar për mbledhjen apo depozitimin e nënshkrimeve sipas Kodit Zgjedhor, ne vlerësojmë se një periudhë prej gjashtë muajsh (duke përjashtuar muajin e ndalimit) do të ishte e mjaftueshme."

Nga ana e tij, Kryetari i KQZ-së, Ilirjan Celibashi, konfirmoi miratimin e kërkesës dhe përcaktoi kalendarin e mbledhjes së nënshkrimeve nga qytetarët.

"Ne e vlerësojmë këtë kërkesë në përputhje me parashikimet e Kodit Zgjedhor dhe do t'ju pajisim me fletët tip për mbledhjen e nënshkrimeve. Periudha e mbledhjes së nënshkrimeve do të jetë deri më 31 mars të vitit 2027, duke filluar nga dita e hyrjes në fuqi të këtij vendimi," deklaroi Celibashi.

Kryetari i KQZ-së sqaroi gjithashtu se procesi do të ndërpritet gjatë muajit të fundit të vitit:

"Procesi do të pezullohet për periudhën kohore nga 1 dhjetori deri më 31 dhjetor 2026, sipas parashikimeve ligjore. Pasi t'i mblidhni, do t'i depozitoni të gjitha në KQZ për vlerësimin e procesit."

Pas këtij vendimi, grupi nismëtar pritet të pajiset me dokumentacionin përkatës për të filluar grumbullimin e firmave mbështetëse në të gjithë vendin. Për informacione më të detajuara mbi procedurat ligjore të nismave qytetare apo të dhëna zyrtare lidhur me mbarëvajtjen e proceseve zgjedhore dhe referendumeve, mund të vizitoni faqen zyrtare të Komisionit Qendror të Zgjedhjeve.

Iniciatorë: Ky grup përbëhet nga 12 anëtarë, të cilët janë shtetas shqiptarë me të drejtë vote: Besjana Guri, Blendi Salaj, Ersid Domnori, Gentiana Kaplani, Gëzim Shuli, Irini Myftaraj, Joniada Gjelo, Lazion Petri, Mateo Yskollari, Migena Kukli, Olti Dërvishi dhe Rikaldo Çelaj.