Në fjalën e saj në Komisionin për Evropën dhe Punët e Jashtme, deputetja e PD, Albana Vokshi ka ngritur me tone të forta &cce...
POLITIKE
Garo: Policia po merr rolin e ‘redaktorit’ dhe tenton të fshehë ngjarjet, duke mos i raportuar, gazetarët të ngrihen në protestë
PiranjatPërditësimi i fundit 8 May 2026, 14:40
Zëdhënësja e Partia Demokratike e Shqipërisë, Floriana Garo, në një deklaratë për mediat tha se vendimi i Policisë së Shtetit për të kufizuar komunikimin e informacionit mbi ngjarjet kriminale përbën një përpjekje për censurë dhe kontroll të informacionit publik.
Garo u shpreh se drejtori i Policisë, Skënder Hita, po vepron nën urdhrat e kryeministrit Edi Rama, duke bërë që informacioni për ngjarjet kriminale të kalojë fillimisht në “filtrin e partisë” dhe jo të bëhet publik në kohë reale për mediat dhe qytetarët.
Sipas saj, kjo mënyrë komunikimi synon të fshehë problematika që lidhen me korrupsionin, mënyrën e reagimit të policisë dhe trajtimin e ngjarjeve kriminale. Garo deklaroi se mungesa e informimit të menjëhershëm krijon mundësi për manipulim të raportimeve dhe shmangie të përgjegjësive institucionale.
Ajo solli si shembull ndryshimet në raportimet zyrtare për vrasjen e të riut Klodian Rasha, duke thënë se raste të tilla tregojnë rëndësinë e transparencës dhe raportimit në kohë reale.
Deklarata e zëdhënëses së PD, Floriana Garo:
Skënder Hita, nën urdhrat e Kryeredaktorit dhe Censorit të Përgjithshëm, Edi Rama, doli para shqiptarëve për t’u treguar se, informacioni rreth ngjarjeve kriminale do të kalojnë fillimisht në filtrin e partisë. Si rrjedhojë nuk do të ketë komunikata shtypi për çdo ngjarje, siç ka qenë tradita, për gazetarët.
Kjo është një përpjekje e qartë për të fshehur korrupsionin, përfshirjen dhe amatorizmin e policisë në ndjekjen, zbulimin dhe parandalimin e ngjarjeve kriminale.
Kjo është përpjekje që Policia dhe qeveria, duke mos shpërndarë informacionin në kohë reale, të kenë mundësi që të bëjnë rolin e ‘Redaktorit’, dhe t’i raportojnë ngjarjet në fund të muajit. Pra, pasi të ketë kohën e mjaftueshme dhe mundësinë për të fshehur çdo implikim apo pazotësi të saj në ngjarje të caktuara.
Qytetarëve duhet t’u kujtohet se si ndryshoi disa herë raportimi për vrasjen nga Policia të të riut Klodian Rasha. Ky vendim i drejtorit të Policisë, me urdhër nga lart, synon pikërisht që të mos ketë më raste të ngjashme kur policia ‘del zbuluar’, duke raportuar informacione që nuk përputhen me ngjarjen dhe kthehen në mashtrim publik dhe mbeten në rekorde.
Komuniteti i gazetarëve duhet të protestojë fuqishëm ndaj kësaj përpjekjeje për ta mbajtur policinë të kriminalizuar dhe median larg, duke i pamundësuar skanimin në kohë reale të vrasjeve, plagosjeve, grabitjeve etj., por edhe reagimin e Policisë ndaj tyre.
Ata do të kenë mbështetjen e Partisë Demokratike.
Përpjekja e Hitës për ta përshkruar këtë masë si ‘ruajtje të shëndetit mendor të qytetarëve’ është terminologji boshe për të fshehur censurën, për të mos thënë gallatë. Shëndeti mendor i njerëzve nuk është tagër i Policisë së shtetit.
Krejt e kundërta, me këtë masë është drejtori i Policisë që duhet të konsultohet me psikologun.
Kjo është një arsye tjetër se pse sot, në ora 19.00, duhet të protestojmë kundër Policisë dhe kundër qeverisë.
