Dhuna ndaj protestuesve në Zvërnec nga rojet private, reagon Rama

Kryeministri Edi Rama ka reaguar në lidhje me incidentet që ndodhën gjatë protestës së djeshme në Vlorë, ku qytetarë dhe aktivistë protestuan kundër ndërtimit të një resorti turistik në zonë, si dhe u dhunuan nga roje private.

Rama shprehet se nesër do të dalë në një komunikim live në orën 10:00 për të sqaruar projektin duke mos dhënë asnjë sqarim se pse u ushtrua dhunë ndaj qytetarëve.

Postimi i plotë:

Nesër e kam radhën unë për të folur për një projekt të jashtëzakonshëm për Shqipërinë, për të cilin punohet prej disa vitesh tanimë dhe i cili nuk ka asnjë lidhje me disa të pavërteta të mëdha, që janë hedhur në qarkullim ditët e fundit.

Ndërkohë e përgëzoj lidershipin e Policisë së Shtetit për reagimin e shpejtë e të saktë, qoftë ndaj atij grushti muskujsh pa tru me statusin e rojeve private të sigurisë, qoftë ndaj drejtuesve vendorë të policisë së Vlorës.

Qasja e re e tolerancës zero ndaj çdo uniforme blu që cënon besimin e publikut, është e duhura.

*Për vetë projektin dhe të vërtetat e të pavërtetat rreth tij, më shumë nesër në 10.00. Live për të gjithë të interesuarit natyrisht.