“Dimali nuk duhet të shkrihet"/ Kryebashkiakja socialiste kundër Ramës: Mbroj interesat e qytetarëve, kam bërë betimin mbi Kushtetutë

DIMAL- Bashkia Dimal ka zhvilluar këtë të hënë një mbledhje emergjente të Këshillit Bashkiak, ku në fokus ishte propozimi për shkrirjen e kësaj bashkie dhe bashkimin e saj me Bashkinë Berat. Fillimisht në nisje të mbledhjes është lexuar relacioni i propozuar për shkrirjen e Bashkisë Dimal dhe bashkimin e saj me Beratin.

Këshilltarët bashkiakë kanë theksuar se arsyet e paraqitura në relacion kanë të bëjnë me lidhjen historike mes dy zonave, shtrirjen përgjatë lumit Osum dhe ekzistencën e spitalit në qytetin e Beratit. Por, këshilltarët e Dimalit kanë kundërshtuar këto argumente, duke theksuar se ato nuk përputhen me analizën e paraqitur në raportin e ekspertëve.

Kundër propozimit të shkrirjes së bashkisë Dimal, ka dalë edhe vetë kryetarja e bashkisë, Juliana Memaj, e cila ka theksuar se bashkia që ajo drejton vetëfunksionin dhe ka një performancë të lartë ekonomike. Memaj ka deklaruar më tej se ajo mbron interesat e qytetarëve që e kanë zgjedhur dhe interesa që burojnë sipas saj nga betimi që ajo ka bërë mbi Kushtetutë përpara se të marrë mandatin.

“Mungesa e analizës apo studimit për avantazhet e propozimit, mungesa e projeksioneve të së ardhmes së njësisë së re të dalë nga propozimi, mbi efektet e mundshme në zhvillimin e hapësirës sonë administrative, efektet e shërbimeve ofruar qytetarit e bëjnë të pavlefshëm propozimin për të konsideruar. Përfundimisht për të gjitha arsyet që parashtrova shpreh qëndrimit tim kundër propozimit të komisionit të reformës territoriale.

Ky qëndrim vjen si detyrim i mbrojtjes së interesave të qytetarëve të bashkisë Dimal, detyrim i cili rrjedh nga lidhja e veçantë me ta dhe në përmbushje të betimit të bërë mbi kushtetutë përpara marrjes së këtij mandati. Pra Dimali si njësi vendore që vetëfunksionin dhe ka një performancë të lartë ekonomike duhet të jetë njësi vendore më vete”, tha kryetarja e bashkisë Juliana Memaj

Në fund të mbledhjes, anëtarët e Këshillit Bashkiak Dimal kanë votuar pro pavlefshmërisë së propozimit për shkrirjen e bashkisë, si dhe pro mosshkrirjes së Bashkisë Dimal. Konkretisht, 18 nga 21 anëtarët e Këshillit Bashkiak Dimal kanë miratuar me votat “Pro” pavlefshmërinë e këtij propozimi dhe po me votat “Pro” moshkrirjen e Dimalit si bashki.