Dy orë takim në Pogradec, zbardhen diskutimet e Ramës brenda ish-shtëpisë së Enver Hoxhës

Prej dy orësh ka nisur në rezidencën qeveritare në Pogradec takimi i thirrur nga kryeministri Edi Rama me 12 drejtuesit politikë të qarqeve nga ana e PS, si dhe kryetarët e komisioneve parlamentare.

Burime bëjnë me dije se deri më tani është mbajtur vetëm fjalimi nga kryeministri Rama rreth një orë. Ky I fundit ka kërkuar që të lexohen dy dokumente të rëndësishme “Besa” dhe “Prania Besnike”, dhe nga ana tjetër pjesë e fjalimit ka qenë dhe shkrirja e bashkive ku ka patur dhe debate.

Rama ka pyetur drejtuesit politikë të atyre bashkive që flitet për shkrirjen se përse ka patur një revoltë me Partinë Socialiste dhe t’u shpjegonin qytetarëve se kjo shkrirje do të sillte më shumë shërbime dhe më shpejt.

Rama mësohet gjithashtu se u ka kërkuar drejtuesve politikë që të fillojnë të mendojnë për emrat e zgjedhjeve lokale në 2027 duke u kërkuar emra dhe figura që janë më afër komunitetit.

Rama është ndalur tek dokumenti “Besa” ku është shprehur se ky dokument duhet t’u shpërndahet jo vetëm deputetëve por dhe kryetarëve të bashkive dhe kryetarëve të partive përkatëse që të gjithë të njihen me këtë dokument. Më tej, kryeminsitri u ka kërkuar drejtuesve politikë më tepër prani në komunitet.

Sa i përket kryetarëve të komisioneve parlamentare u ka kërkuar më tepër aktivizim në media dhe më tepër kujdes më menyrën se si përcillen ligjet drejt publikut.

Ditën e nesërme mësohet se nuk do të jenë vetëm ministrat të pranishëm por edhe drejtorët e mëdhenj dhe në fund do të ketë një dokument të përpiluar sa i përket gjithë diskutimeve që janë kryer që me ditën e sotme, si dhe do të ngrihen edhe disa objektiva sa i përket zgjedhjeve të vitit 2027.

Mbledhja do të mbyllet përsëri me një fjalim nga kryemininstri Rama ndaj drejtuesve politikë, fjalim i cili parashikohet rreth orës 17:00.