16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
POLITIKE
Flamuri i UÇK-së ngrihet para Kryeministrisë, protestuesi: Historia e Kosovës u shkrua me gjak!
PiranjatPërditësimi i fundit 16 September 2026, 20:35
Vendimi i Dhomave të Specializuara në Hagë për ish-krerët e Ushtrisë Çlirimtare të Kosovës ishte një nga temat kryesore të protestës së 109-të të zhvilluar sot para Kryeministrisë në Tiranë.
Nga podiumi i protestës, ku kërkohet largimi i kryeministrit Edi Rama dhe qeverisë së tij, një prej qytetarëve reagoi me tone të forta ndaj vendimit, duke deklaruar se ai nuk mund të ndryshojë historinë e luftës së Kosovës.
Duke mbajtur në duar flamurin e UÇK-së, protestuesi e cilësoi ditën si një moment zie për shqiptarët që kanë përjetuar luftën.
“Mirëmbrëma të gjithëve, shikojeni këtë flamur, ky është flamur i një lufte për liri. Flamur i cili u la me mijëra të vrarë. Për atë flamur mbi 20 mijë shqiptarë u vranë. Mijëra gra u dhunuan, sot është ditë zie për të gjithë ata që kanë përjetuar luftën”, u shpreh ai.
Protestuesi hodhi më tej akuza ndaj Evropës, duke e krahasuar vendimin e sotëm me zhvillime historike të vitit 1913.
“Sot kombi shqiptar u pre në besë nga Europa. Kjo na kujton 1913, kur Kosova iu dha Serbisë. Plagët u hapën përsëri, ky vendim është thikë pas shpine”, deklaroi ai.
Sipas tij, aktgjykimi nuk ndryshon atë që përfaqëson lufta e UÇK-së dhe historinë e Kosovës.
“Ky vendim vret për së dyti ata që dhanë jetën për vendin tonë. UÇK bëri luftë të drejtë. Kosova është e lirë, pasi ka burra. Ky vendim nuk e ndryshon të vërtetën. Historia e Kosovës nuk është shkruar në Hagë, por me gjak në tokën e Kosovës”, tha protestuesi.
Ai kritikoi gjithashtu kryeministrin Edi Rama dhe politikës së tij ndaj Serbisë.
“Ku po shkojmë kur Rama promovon marrëdhënien me Serbinë. Nuk ke të drejtë të thuash ‘marre’, pasi je në anën e tradhtarëve”, deklaroi qytetari.
