Ambasada e Shteteve të Bashkuara në Tiranë ka përcjellë një nga mesazhet kryesore të sekretarit amerikan të Shte...
POLITIKE
Gazeta gjermane ngre pyetjen: A do e dorëzojë SHBA Artur Shehun, partnerin e Kushnerit
PiranjatPërditësimi i fundit 10 Gusht 2026, 18:20
Nga Fabio Nacci*/ Një urdhër-arresti për pastrim parash të lidhur me trafikun e kokainës, i lëshuar në një vend kandidat për anëtarësim në BE. Dhe një banesë e njohur: një pronë shumë milionëshe në Miami Beach, në gjirin e Biscayne. Artur Shehu, njeriu që shiti tokën në ishullin e Sazanit për resortin luksoz në Shqipëri, të promovuar nga Jared Kushner, dhëndri dhe këshilltari i presidentit amerikan, po jeton me dy jetë paralele që prej qershorit. Dhe askush në anën tjetër të Atlantikut nuk duket se po nxiton për t’i bashkuar këto dy çështje.
Një logjikë e ndryshme vlejti për të bashkëpandehurin e tij. Më 30 korrik, Gjykata e Apelit në Selanik miratoi ekstradimin e Ilir Shtufit, një biznesmen ndërtesash shumëkatëshe në Tiranë. Ai ishte arrestuar në qershor në një hotel në qytetin e dytë më të madh grek, pas një informacioni nga Interpoli. Shtufi, të cilin mediat shqiptare e lidhin me djalin e liderit të opozitës, Sali Berisha, u mbrojt duke pretenduar se po persekutohej politikisht. Ai do të jetë i pandehuri i parë në çështjen “Aruba” që ekstradohet nga jashtë drejt Prokurorisë së Posaçme kundër Korrupsionit dhe Krimit të Organizuar (SPAK). Nga 20 urdhër-arrestet e SPAK-ut, deri tani janë ekzekutuar gjashtë.
Po kush është Shehu, personi në qendër të kësaj çështjeje? Një sipërmarrës i cili, sipas një investigimi të Miami New Times dhe rrjetit OCCRP, kaloi vite duke blerë nga Florida toka bregdetare në atdheun e tij.
Avokati i tij e tregon historinë kështu: Në vitin 1998, Shehu kërkoi azil politik në SHBA pasi “banda kriminale” i vranë vëllain dhe xhaxhain para syve – fakt që Reuters nuk ishte në gjendje ta verifikonte në mënyrë të pavarur. Ai nuk është dënuar kurrë. Megjithatë, që në vitin 2013, dokumentet gjyqësore të shqyrtuara nga CBS News tregojnë se banorët e Zvërnecit kundërshtuan pronësinë e tij mbi këto prona.
200 faqet e dosjes hetimore, të datës 12 qershor të shqyrtuara edhe nga Reuters, japin përgjigjen e hetuesve. SPAK-u akuzon Shehun dhe partnerët e tij se kanë futur kokainë nga Amerika e Jugut në portet evropiane dhe se kanë investuar fitimet në një perandori të pasurive të paluajtshme: blerje tokash me mjete të paligjshme dhe dokumente të falsifikuara pronësie, duke “krijuar tituj të rremë pronësie ose duke zmadhuar artificialisht sipërfaqet”. Hetimi është rezultat i përgjimeve të kryera në kuadër të hetimeve për trafikun e drogës.
Në prill, Shehu i shiti pronat bregdetare kompanisë “Albania Land Development”, shoqëria që qëndron pas projektit të Kushnerit. Shuma e shitjes – 110 milionë euro, sipas dokumenteve të shqyrtuara nga Reuters – u bllokua në llogarinë e noteres përpara se paratë të arrinin tek ai.
Dosja e SPAK nuk përmban asnjë akuzë ndaj Kushnerit, kompanive të projektit apo investitorëve. Partnerja shqiptare e Kushnerit, “Sazan Real Estate Development”, deklaroi për Newsweek se ajo “nuk është objekt i asnjë hetimi” dhe se blerjet e tokës janë kryer në mënyrë të ligjshme.
Mbrojtja i hedh poshtë të gjitha akuzat. “Asgjë nga ato që janë thënë për karakterin e zotit Shehu nuk është e vërtetë: ai nuk është as trafikant droge dhe as falsifikues dokumentesh”, deklaroi avokati Kujtim Cakrani për Reuters.
Familja, sipas tij, e zotëron tokën që nga koha e Perandorisë Osmane dhe shitja ka qenë e ligjshme. Vetë Shehu e ka cilësuar pronësinë e tij në një emision televiziv shqiptar si “të padiskutueshme”.
Ai tha se tokën e kishte shitur përmes një ndërmjetësi dhe se nuk e dinte se kush e kishte blerë përfundimisht. Një duzinë banorësh të Zvërnecit i paraqitën Reuters-it dokumentet e tyre të pronësisë dhe dokumentet tatimore; përfaqësuesi i tyre ligjor synon të kërkojë në gjykatë ndalimin e punimeve të ndërtimit.
Këtu historia pushon së qeni thjesht shqiptare.
Cakrani konfirmoi se klienti i tij e di për urdhër-arrestin dhe se nuk është i shqetësuar për të. Në përgjigje të një kërkese nga Reuters, një zëdhënës i Departamentit Amerikan të Drejtësisë refuzoi të tregonte nëse nga Tirana ishte bërë ndonjëherë kërkesë që Shehu të gjendej ose të ndalohej në Miami.
Rezultati është një standard i dyfishtë: Greqia ekstradon një bashkë të akuzuar brenda shtatë javësh. SHBA-ja, ku jeton i dyshuari kryesor dhe ku dhëndri i presidentit po promovon projektin, nuk ka nevojë as të përgjigjet.
Politika shqiptare e trajton emrin me kujdes të dukshëm ndërpartiak.
Mediat në Tiranë kujtojnë se Shehu kishte shërbyer në Gardën e Republikës gjatë presidencës së Berishës dhe se pronat u grumbulluan gjatë viteve të qeverive demokratike. Megjithatë, projekti është miratuar nga qeveria aktuale e Edi Ramës, dorëheqja e të cilit kërkohet në protestat që kanë vazhduar prej muajsh.
Opozita sulmon resortin – por për sa i përket emrit Shehu, Berisha mbetet çuditërisht i heshtur.
Në Tiranë po përgatitet marrja e parë në pyetje. Burri në Miami, për momentin, nuk ka asnjë arsye për t’u nxituar.
*Marrë nga gazeta berlineze Junge Welt. Titulli origjinal:"Shqipëria: Nën hetim shitja e tokës për një resort luksoz"
