Happy Birthday Edi Rama!

Happy Birthday Edi Rama! Të uroj edhe 100 vite pa pushtet, pa pasuri, pa prona, me 700 mijë lek qira, 170 mijë lek pension dhe 50 mijë lekë bonus çdo 6 muaj, verërat e shtrenjta t’i zëvendësosh me teke raki te lokali më i humbur i Surrelit.

Kur të kesh nevojë për shërbime shëndetësore se ke dhe një farë moshe, të shkosh që në 5 të mëngjesit dhe të mbash radhë, pastaj në orën 11 të kuptosh që nuk ke për të mbaruar punë atë ditë. Pastaj do kuptosh se nuk mbaron dot punë as të nesërmen. Në shumë raste do kuptosh se nuk mbaron dot punë as pas 6 muajsh.

Zahon ta çosh në shkolla publike, aty ku fëmijët e shqiptarëve dhunohen, bullizohen dhe mbi të gjitha nuk arsimohen e edukohen. Ta çosh në shkollë me autobus linje, pa kondicioner. Edhe pazarin të shkosh ta bësh me autobus, aty ku do gjesh domatet e specat 10 lekë më lirë, siç bëjnë shumica e pensionistëve.

Unë nuk të uroj burg, se dënimi yt i vërtetë është të jetosh pjesën e mbetur të jetës në mjerimin që jeton një pjesë shumë e madhe e popullit tënd!

Nga Fabjona Pasho!