Pse ekzistojnë dy versione të trofeut të Kupës së Botës? Cila është historia që pas trofeut më të famsh...
POLITIKE
I shau dhe ofendoi për protestën/ Të rinjtë i përgjigjen Ramës: DORËHEQJE!
PiranjatPërditësimi i fundit 16 Qershor 2026, 19:33
Qytetarët u grumbulluan në sheshin Skënderbej, sërisht për të vijuar më pas marshimin përgjatë bulevardit “Dëshmorët e Kombit” dhe për t’u stacionuar para Kryeministrisë, ku të rinjtë mbajtën fjalimet dhe kundërpërgjigjet ndaj deklaratave të kryeministrit.
Studentët dhe të rinjtë deklaruan nga podiumi: “Studentët dhe të rinjtë nuk të duan më! Kanë 17 ditë që po ta thonë pa ndalim: Jep dorëheqjen!” Ata shtuan se protesta i është dedikuar të rinjve dhe studentëve, si brezi që, sipas tyre, duhet të ndërtojë të ardhmen e vendit. “Të gjithë ata që do ta ndërtojnë Shqipërinë dhe duan që ta bëjnë një Shqipëri më të denjë për të jetuar”, u shpreh një nga folëset.
Nga podiumi u bë gjithashtu thirrje për pjesëmarrje aktive: “Të gjithë të rinjtë të cilët duan sot të flasin, por edhe ata që duan t’i japin mesazh të rinjve, të afrohen pranë podiumit.”
Një nga folësit tha: “Kryeministri është frikësuar nga protesta dhe vazhdon reagimet e tij duke u përpjekur të na hedhë hi syve. Sot studentët kanë përgatitur një kundërpërgjigje fjalë për fjalë, gërmë për gërmë për të gjitha pikat e tij. Ju ftojmë ta dëgjoni me vëmendje.”
Duke iu përgjigjur pikave të deklaruara nga kryeministri, një i ri u shpreh: “Pika e parë: Kryeministri tha që ky investim është në interesin publik. Një pyetje: Kur ka qenë hera e fundit që një investim ka qenë në interesin publik? Prandaj ne vazhdojmë të themi: Anulo projektet! Anulo projektin dhe zhduku nga Shqipëria!”
Një tjetër folës deklaroi: “Zoti Kryeministër tha që kjo protestë po dëmton turizmin dhe imazhin e Shqipërisë. Po a e di zoti Kryeministër që ka familje shqiptare që nuk kanë shkuar kurrë prej vitesh për pushime?” Ai shtoi gjithashtu: “Kryeministri tha që kjo protestë ka brenda të keqen e madhe të ekstremizmit. Por ai dhe klasa politike që ne kemi pasur në 35 vitet e fundit ka qenë e keqja ekstreme më e madhe e këtij vendi.”
Një tjetër pjesëmarrës u shpreh: “Kjo protestë ka ekzaltuar mendjet e të rinjve dhe të rejave. Diçka që kjo klasë politike s’e ka bërë që 30 vjet. Jemi të bindur se deti u bë kos, qeveria po mbytet dhe një orë e re ka ardhur për shqiptarët që s’u mbushën dot kurrë!”
Një nga folësit vijoi: “Në të vërtetë, i zhgënjyeri i vërtetë është Rama që nuk po e zbeh dot protestën! Keqardhje ne ndjejmë sepse: Ku janë inxhinierët që do ta ndërtojnë Shqipërinë që këta shkatërruan? Ku janë doktorët dhe mjekët që do t’i mjekojnë plagët e kësaj Shqipërie që këta e plagosën? Ku janë arsimtarët që do ta edukojnë brezin e ri që këta i lanë rrugëve?”
Në përmbyllje, protestuesit përsëritën kërkesën e tyre: “Si pjesë e protestës, kemi vetëm një mesazh për ty Edi Rama: Dorëheqje! Dorëheqje!”
