Java e katërt e protestës në Divjakë/ Banorët marshojnë në ditën e 26-të kundër shkrirjes së bashkisë

Banorët e Divjakës kanë shënuar ditën e 26-të të qëndresës së tyre kundër reformës së re administrative-territoriale të propozuar nga Partia Socialiste, e cila parashikon shkrirjen e kësaj bashkie së bashku me 14 të tjera në nivel kombëtar.

Gjatë fjalimeve në shesh, organizatorët u kanë bërë thirrje qytetarëve për një pjesëmarrje edhe më masive për të fuqizuar reagimin e komunitetit. Përmes një apeli të drejtpërdrejtë, folësit kërkuan nga deputetët e zonës në Kuvend që të dalin në mbrojtje të banorëve dhe të votojnë kundër projektit që, sipas tyre, e kthen Divjakën dekada pas.

Protestuesit u shprehën të vendosur për të vijuar qëndresën deri në fund me synimin për të bllokuar miratimin e projektligjit në parlament. Ashtu si çdo natë, tubimi i mbrëmjes së 26-të u përmbyll me një marshim në rrugët kryesore të qytetit, ku banorët vijuan thirrjet kundër prishjes së autonomisë vendore.