Kalaja: Të gjitha rrugët e trafikut të drogës çojnë te Rama, po fshihen qëllimisht faktet

Avokatja Adriana Kalaja ka reaguar pas publikimit të lajmeve mbi trafikimin e drogës përmes mjeteve diplomatike shqiptare, duke akuzuar qeverinë dhe drejtësinë se po fshehin përgjegjësit e vërtetë të këtij aktiviteti kriminal.

Në një reagim në rrjetet sociale, Kalaja shkruan se informacioni i publikuar në media përmban vetëm ‘gjysmë të vërteta’, të cilat sipas saj shërbejnë për të devijuar vëmendjen nga përgjegjësit kryesorë.

Sipas saj, mediat pranë qeverisë kanë theksuar faktin se trafiku kryhej përmes mjeteve diplomatike me targa CD, ndërkohë që opozita i ka denoncuar prej vitesh këto raste.

Kalaja ndalet veçanërisht te përmendja në raportime e ish-ministrit për Europën dhe Punët e Jashtme, Gent Cakaj, duke theksuar se ai nuk u dekretua asnjëherë si ministër nga Presidenti i atëhershëm, Ilir Meta.

Sipas Kalasë, harresa e këtyre fakteve nuk është e rastësishme, por lidhet me përpjekjet për të mbuluar përgjegjësit politikë.

Në fund të reagimit të saj, Kalaja kujton se ngjarjet në fjalë përkojnë me periudhën pas shembjes së Teatrit Kombëtar dhe gjatë pandemisë, kur sipas saj kontrollet mbi lëvizjen e mjeteve ishin pothuajse inekzistente.

Reagimi i avokates Adriana Kalaja në rrjetet socialet:

Të gjithë rrugët e trafikut të drogës, të çojnë te banditi  Kryeministër.

Sot në media të ndryshme, rrodhi lajmi i trafikimit të drogës edhe nëpërmjet ambasadave shqiptare apo ambasadorëve, ndërkohë, kishte shumë gjysëm të vërteta në to.

Dhe siç dihet, gjysëm të vërtetat janë gënjeshtra të hidhura dhe të dëmshme.

Kështu, kryesisht sipas mediave të inceneratorëve, bazuar në informacionin e cunguar qëllimisht nga Altin Paja, u tha se ky trafik, bëhej edhe nëpërmjet mjeteve të ambasadave me targa CD.

Çfarë ka të re ky lajm kur opozita dhe kryesisht Kryetari i PD-së Z. Sali Berisha, e ka denoncuar me dhjetëra herë.

Deri edhe te fakti se ky trafik bëhej ne avionë charter të përdorur nga vëllai i Olsit të Xibrakës, të cilët minimalisht i kanë kushtuar shqiptarëve 22 milionë euro.

Ndërkohë, problemi kryesor me këtë lajm nuk qëndron këtu.

Qëndron në faktin se emri i ministrit të kohës që lakohet në lajm, është ai i Gent Cakaj.

Gent Cakaj siç rezulton dhe si duket e keni harruar, u refuzua e nuk u dekretua nga Presidenti Meta, ashtu si dhe shumë akte të tjera antishqiptare, kriminale dhe korruptive të kësaj narko qeverie.

Dhe si kundërpërgjigje të kësaj, Ministër i Jashtëm u dekretua vetë i biri i Kristaqit, detyrë të cilën ja kaloi me delegim Gentit të Baton Haxhisë.

Pse harrohen kaq shpejt faktet dhe të vërtetat në këtë vend?!

Sepse të gjithë rrugët e trafikimit të drogës, kalojnë nga banditi Kryeministër, para të cilat, janë përdorur në shumicë për të kapur mediat por edhe për të prodhuar sistemin e drejtësisë të Altin Pajës dhe Irenave me shumë mbiemra, datëlindje dhe pashaporta.

PS: Dhe të mendoni që ka qenë shumë pak kohë pas shembjes barbare të Teatrit Kombëtar e periudhë pandemie, ku kontrollet e mjeteve ishin pothuaj inekzistente.