Kapidani: Propaganda e Ramës ‘10 milionë turistë’ nuk fsheh dot dështimin e shtetit përballë krimit

Sekretarja për Marrëdhëniet me Publikun në PD, Viola Kapidani, e cilëson vrasjen e një turisti të huaj në Shqipëri si kambanë alarmi për sigurinë dhe turizmin.

Në një postim publik në rrjetet sociale, Kapidani shprehet se propaganda për “10 milionë turistë” nuk mund të fshehë pasigurinë dhe kriminalitetin në vend.

Sipas saj, turistët zgjedhin destinacionet ku ndihen të sigurt, ndërsa pa rend dhe siguri, çdo bum turistik është vetëm propagandë.

Vrasja e një turisti të huaj në Shqipëri është një kambanë alarmi për një shtet që ka kapitulluar përballë krimit.
Edi Rama prej vitesh na shet propagandën e “bumit turistik” dhe 10 milionë turistëve. Por çfarë vlere kanë shifrat e propagandës, kur një turist vjen në Shqipëri dhe humb jetën?

Rama merakoset për algoritmin dhe pse nuk u shitën biletat e Kanye West. Por problemi nuk është algoritmi. Problemi është Shqipëria që ai vetë ka bërë antireklamë, duke e lidhur me krimin, mafien dhe pasigurinë.

Turizmi sot është në pikën e tij më kritike. Sepse turistët nuk votojnë propagandën e Ramës. Ata zgjedhin ku ndihen të sigurt.

10 milionë turistë në statistikat e Kryeministrit nuk mund të fshehin dot një të vërtetë: pa shtet, pa rend dhe pa siguri, çdo “bum turistik” është vetëm propagandë.