KASH reagon ndaj Vuçiçit: Uji s’mund të përdoret si presion politik, SHBA-BE të ndërhyjnë

Këshilli i Ambasadorëve Shqiptarë (KASH) ka reaguar ndaj deklaratës së Presidentit të Serbisë, Aleksandar Vuçiç, për mundësinë e ndryshimit të rrjedhës së lumit Ibër, duke paralajmëruar se burimet ujore nuk duhet të përdoren si instrument presioni politik ndaj Kosovës.

Në një deklaratë zyrtare, KASH shpreh “shqetësim të thellë” për deklaratën e Vuçiçit, sipas së cilës autoritetet serbe po shqyrtojnë mundësinë e ndryshimit të rrjedhës së lumit dhe kanë angazhuar ekspertë për këtë çështje.

Këshilli thekson se Ibri dhe sistemi i Ujmanit/Gazivodës kanë rëndësi jetike për furnizimin me ujë, prodhimin e energjisë, ekonominë dhe jetën e qytetarëve të Kosovës, pavarësisht përkatësisë së tyre etnike.

Sipas KASH-it, çdo ndërhyrje e njëanshme që mund të ndryshojë rrjedhën natyrore të lumit dhe të shkaktojë pasoja ndërkufitare duhet të trajtohet në përputhje me të drejtën ndërkombëtare dhe nuk mund të konsiderohet vetëm një çështje e brendshme e Serbisë.

Në këtë kontekst, Këshilli përmend parimet e përdorimit të drejtë dhe të arsyeshëm të burimeve të përbashkëta ujore, parandalimin e dëmeve ndaj palëve të tjera, si dhe detyrimin për bashkëpunim, shkëmbim informacioni dhe konsultim paraprak.

“KASH e konsideron të papranueshme përdorimin e ujit dhe të burimeve të tjera jetike si instrument presioni politik. Një retorikë e tillë është në kundërshtim me frymën e bashkëpunimit rajonal, marrëdhënieve të fqinjësisë së mirë dhe parimeve mbi të cilat duhet të ndërtohet e ardhmja evropiane e Ballkanit Perëndimor”, thuhet në deklaratë.