Këlliçi: Shqipëria e fundit në Europë për fuqinë blerëse të pagës minimale, Rama shet propagandë për suksese

Nënkryetari i Partisë Demokratike, Belind Këlliçi, ka reaguar përmes një postimi në rrjetet sociale lidhur me nivelin e pagave dhe fuqinë blerëse në Shqipëri, duke akuzuar qeverinë se po paraqet një realitet të ndryshëm nga ai i qytetarëve.

Ai ka publikuar një grafik që, sipas tij, tregon renditjen e Shqipërisë për pagën minimale dhe fuqinë blerëse të qytetarëve me këto të ardhura. Sipas përfaqësuesit të PD-së, vendi renditet i fundit në Europë, ndërsa çmimet janë më të larta se mesatarja e Bashkimit Europian.

Reagimi i nënkryetarit të PD, Belind Këlliçi:

Ky grafik tregon renditjen e Shqipërisë sa i përket pagës minimale dhe fuqisë blerëse me këto të ardhura. Sipas propagandës së Edi Ramës, ne po kalojmë suksese të mëdha të paimagjinueshme. Sipas të dhënave reale, jemi të fundit në Europë.

Paga minimale më e ulëta në kontinent, ndërkohë që çmimet janë më të larta se mesatarja e BE.

Maqedonia e Veriut, Mali i Zi, apo Serbia kanë shumë përmirësime në këtë renditje. Ne jemi në fund të listës.

Me Edi Ramën pabarazia sociale dhe varfëria janë thelluar. Shqipëria është kthyer në parajsë për oligarkët, miqtë dhe klientët e Kryeministrit ndërsa për shumicën një vend ku mbijetohet, ku mezi mbyllet muaji.