Këshilli Bashkiak i Selenicës kundër bashkimit me Vlorën, Bellaj: Bashkia duhet të mbetet e pavarur

Këshilli Bashkiak i Selenicës është mbledhur në një seancë të jashtëzakonshme, ku në qendër të diskutimeve ishte projekti për bashkimin e Bashkisë së Selenicës me Bashkinë e Vlorës.

Gjatë mbledhjes, kryetari i Bashkisë Selenicë, Nertil Bellaj, shprehu kundërshtimin e tij ndaj këtij propozimi, duke argumentuar se Selenica duhet të vijojë të funksionojë si një njësi vendore e pavarur.

Sipas Bellajt, bashkimi me Vlorën do të cenonte përfaqësimin e banorëve dhe do të ndikonte në zhvillimin e zonës. Ai theksoi se Selenica ka identitetin, territorin dhe nevojat e saj specifike, të cilat kërkojnë një administrim të veçantë.

Kryebashkiaku deklaroi se do të vijojë të kundërshtojë projektin e bashkimit dhe të mbrojë interesat e banorëve të Selenicës.

Mbledhja e Këshillit Bashkiak vjen në një kohë kur propozimi për riorganizimin e njësive vendore ka hapur debat në disa bashki, ndërsa përfaqësuesit vendorë po shprehin qëndrimet e tyre mbi të ardhmen administrative të zonave që drejtojnë.