Koçeku i ‘përvishet’ Braçes: Kullën në Dukagjin e kemi pa leje, ‘pse-në’ thuaje ti se ke vite deputet aq sa unë i kam jetë

Deputetja e pavarur Marjana Koçeku i është përgjigjur me tone të forta ish-kolegut të saj socialist, Erion Braçe, pas deklaratave të këtij të fundit lidhur me dokumentacionin e pronësisë së kullës së familjes së saj në Dukagjin, ku funksionon agroturizmi “Neomalsore”.

Reagimi erdhi pasi Braçe, gjatë një interviste televizive, ngriti pikëpyetje mbi ligjshmërinë e objektit, duke pyetur pse Koçeku nuk ishte pyetur nëse e kishte me leje kullën pranë liqenit të Komanit.

Në një video të publikuar në rrjetet sociale, Koçeku pranoi se familja e saj nuk disponon dokumentet e pronësisë, por theksoi se kjo është përgjegjësi e shtetit dhe jo e banorëve të zonës.

“Jo, zoti Braçe, nuk i kam letrat. Nona jeme ka ardhë vajzë aty. Është bërë nanë, është bërë gjyshe dhe tre breza, zero dokumente. Prej te Ramiz Alia e deri te Erion Llafia,” shprehet deputetja.

Më tej, Koçeku, e cila disa javë më parë u largua nga Grupi Parlamentar i PS-së për të vijuar mandatin si deputete e pavarur, i drejton një pyetje të drejtpërdrejtë ish-kolegut të saj.

“Më thuaj ti mua, a u ka munguar vullneti prindërve të mi dhe banorëve të Dukagjinit, apo i ka munguar vullneti shtetit? Më kallëzo ti mua, që ke legjislatura sa unë kam vite jetë,” përfundon Koçeku, duke ia faturuar përgjegjësinë institucioneve për mungesën e certifikatave të pronësisë.