Një 28-vjeçar ka denoncuar në polici se është qëlluar me armë zjarri teksa po lëvizte në këmbë në...
POLITIKE
Kompania nën akuzë fiton tenderin! ‘A&E Engineering’ e Entela Çanos 6 milionë € për aksin dytësor Tiranë-Durrës
PiranjatPërditësimi i fundit 10 Gusht 2026, 15:48
Kompania e ekspertes Entela Çano, e cila është dërguar për gjykim nga SPAK për shkelje të barazisë në tendera dhe falsifikim dokumentesh, është shpallur fituese nga Bashkia e Tiranës për mbikëqyrjen e rikonstruksionit të aksit dytësor Tiranë-Durrës. Kontrata, me vlerë rreth 6 milionë euro për punimet, ngre pikëpyetje pasi kompania nuk kishte ofertën më të ulët dhe ndaj saj ekzistojnë akuza zyrtare për abuzime me tenderat publikë.
Një kompani e marrë zyrtarisht nën akuzë nga Prokuroria e Posaçme për abuzim me projektet ndërtimore në vlerë 30 milionë euro do të kryejë mbikëqyrjen e punimeve për rikonstruksionin e aksit dytësor të autostradës Tiranë-Durrës. Kompania “A & E Engineering” e ekspertes Entela Çano është shpallur fituese e procedurës së shpallur së fundmi nga Bashkia e Tiranës.
Në garë kanë marrë pjesë 11 operatorë ekonomikë dhe, për një rastësi thuajse perfekte, gjysma e tyre kanë paraqitur ofertë të njëjtë, madje edhe deri te presja dhjetore.
Ligji i Prokurimeve Publike ndalon pjesëmarrjen në tendera të kompanive që janë dënuar me vendim përfundimtar të formës së prerë. Studioja e Entela Çanos nuk përfshihet ende në ato raste. Megjithatë, fakti që ajo akuzohet zyrtarisht për abuzime me projektet ndërtimore publike mund të ishte një shkak që bashkia e kryeqytetit të tregohej më strikte në shpalljen e saj fituese, aq më tepër që nuk kishte ofertën më të ulët.
Në mesin e qershorit 2026, Prokuroria e Posaçme njoftoi se mbylli hetimet dhe dërgoi për gjykim 7 persona, mes të cilëve kryebashkiakun e Kolonjës, Erion Isai, ish-drejtuesit e Autoritetit Rrugor Shqiptar, Ergys Verdho, si edhe eksperten Çano, të akuzuar për “shkelje të barazisë në tendera” dhe “falsifikim dokumentesh”.
Në dosjen e SPAK-ut thuhet se zyrtarët e Bashkisë dhe ekspertja private janë përgjegjës për abuzimin në tenderin rreth 30 milionë euro për ndërtimin e lotit të dytë të rrugës Korçë-Ersekë. Sipas prokurorëve, “zyrtarët e Autoritetit Rrugor Shqiptar përgatitën dokumentacionin e tenderit, duke u mbështetur në oferta fiktive të përgatitura nga shoqëria fituese “A&E Engineering” sh.p.k., ndërkohë që edhe specifikimet teknike janë përgatitur nga administratorja e shoqërisë, shtetasja Entela Çano”.
Tashmë, studioja e projektimit e Çanos pritet të mbikëqyrë punimet në një prej akseve më të rëndësishme të Tiranës, nga Spitali Hygeia e deri te Megatek.
Pak javë më parë, Bashkia e Tiranës mbylli tenderin për rikonstruksionin e rrugës dytësore, me një gjatësi më pak se 7 kilometra dhe që do t’u kushtojë taksapaguesve rreth 6 milionë euro.
Tashmë, me vendimin e Bashkisë së kryeqytetit, Entela Çano do të ketë përgjegjësinë për të kontrolluar se si do të shpenzohen këto fonde nga kompania që ka fituar të drejtën për rikonstruksionin e aksit rrugor./syri
