Forcat e Ndërhyrjes së Shpejtë janë vendosur përpara Kuvendit, pas tensioneve të raportuara, gjatë protestës e cila po...
POLITIKE
Kryeministri Rama “shpërthen” ndaj protestuesve: Mbetje të rrezikshme socio-politike
PiranjatPërditësimi i fundit 30 Qershor 2026, 12:35
Prej një muaji mijëra qytetarë shqiptarë, brenda dhe jashtë vendit, dalin çdo ditë në protestë duke kërkuar dorëheqjen e kryeministrit Edi Rama. Por kreu i qeverisë, në vend që të dëgjojë kërkesat e tyre, ka zgjedhur që ti sulmojë ato vazhdimisht me fyerje nga më të ndryshmet.
Me anë të një postimi në Facebook, kreu i qeverisë i quan protestuesit “mbetje të rrezikshme socio-politike’ dhe ‘shëmbëlltyra më e zezë e alternativave politike e këtyre 35 vjetëve’.
Postimi i Ramës:
QYTETARËT kanë të drejtë të protestojnë pavarësisht se kush i drejton, manipulon, përdor dhe abuzon me hallet e tyre.
Korja e mbetjeve të rrezikshme socio-politike të bulevardit dhe uji i rrjedhshëm i protestës së qytetarëve që kërkojnë të dëgjohen, janë dy gjëra krejt të ndryshme.
Ai ujë që buron nga halle, shqetësime, probleme reale të jetës së çdo protestuesi apo simpatizanti të protestës, duhet kthyer dhe do ta kthejmë në energji për Shqipërinë 2030 në Bashkimin Europian, duke ndarë me ta reflektimin tonë nga kjo protestë, sapo ta kemi lexuar me vëmendje e përulësi krejt mesazhin e zemërimit të tyre të sinqerte
Ndërsa korja e shpifur që ka bërë bashkë plot dështakë të zemëruar të Shqipërisë, turlilloj personazhesh që japin mend që s’i kanë dhe shfryjnë dufe e mllefe për të cilat s’ua ka fajin askush veç vetes, duhet parë e treguar pa asnjë ngurrim mu siç është:
Shembëlltyra më e zezë e alternativave politike të këtyre 35 vjetëv
Por e mira më e madhe e kësaj proteste, për të cilën do të bëhen pishman edhe armiqtë e dashakeqët e Shqipërisë që qëndrojnë pas cunamit të baltës digjitale, është se në fund nga e gjithë kjo vorbull shumica qeverisëse do të dalë me vullnetin e ripërtërirë për të qenë shumë më afër me popullin
Dhe protestuesit do të fitojnë bashkë me Shqipërinë, ndërsa shembëlltyra e zezë që i keqpërdori do të dështojë e do të thërmohet në çika
