Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
POLITIKE
Miratohet me ndryshime të vogla drafti i ligjeve të reformës në drejtësi
PiranjatPërditësimi i fundit 21 January 2026, 19:11
Komisioni parlamentar i Ligjeve miratoi të mërkurën me disa ndryshime propozimet e deputetit socialist, Olsi Komici për dy nga ligjet e paketës së Reformës në Drejtësi ku parashikohej dhe një dispozitë kalimtare për emërimin e kryetarëve të gjykatave dhe prokurorive, e kontestuar nga Shoqata e Gjyqtarëve.
Sipas variantit të miratuar nga komisioni në ligjin “Për statusin e gjyqtarëve dhe prokurorëve”, me anë të kësaj dispozite kalimtare emërohen në detyrë kryetarët e komanduar të gjykatave apo prokurorive për një periudhë tranzitore nga hyrja në fuqi e ligjit dhe derisa të zgjidhen kryetarët e rinj, por jo më vonë se dhjetori 2027.
Në draftin fillestar propozimi parashikonte qëndrimin në detyrë deri më 31 dhjetor 2028.
Ky propozim u kundërshtua publikisht nga Shoqata Kombëtare e Gjyqtarëve, si tentativa antikushtetuese që cënojnë standardet e shtetit të së drejtës, “uzurpojnë” kompetencat e Këshillit të Lartë Gjyqësor dhe cënojnë pavarësisë e pushtetit gjyqësor.
Sipas shoqatës, nisma ligjore nuk merr në konsideratë faktin që KLGJ ka miratuar aktin normativ përkatës lidhur me procedurën e zgjedhjes së kryetarëve të gjykatave të shkallës së parë dhe të apelit, akt i cili ka hyrë në fuqi në datën 1 janar 2026 dhe që i paraprin hapjes së garës për postet e kryetarëve në këto gjykata.
Komisioni reflektoi edhe ndryshime në draft-propozimet në ligjin “për organet drejtuesve të drejtësisë”, ku terminologjia e përdorur mbi kritetet e përzgjedhjes së kandidatëve në këshillat që lidhej me integritetin moral e profesional është zëvendësuar me kritere të qarta si; të mos kenë masë disiplinore në fuqi, të mos jenë shkarkuar më parë nga detyra si rezultat i një mase disiplinore, në rastin e ish-magjistratëve të kenë kaluar me sukses procesin e rivlerësimit kalimtar të gjyqtarëve dhe prokurorëve ose të mos kenë dhënë dorëheqjen pa iu nënshtruar këtij procesi, ndërkohë që kanë qenë subjekt rivlerësimi, si dhe të mos jenë skualifikuar më parë nga pozicione të ndryshme për shkak të verifikimit të pasurisë dhe figurës.
Ndryshime të tjera në këtë ligj parashikojnë forcim të kritereve të verifikimit të pasurisë dhe integritetit të figurës së kandidatëve për dy këshillat drejtues që vijnë nga avokatia dhe akademia, forcimin e rolit të Prokurorit të Përgjithshëm në procesin e përzgjedhjes së drejtuesve të prokurorive dhe shtimin e kritereve për vetingun e kandidatëve në këto detyra, etj..
Kryetari i Komisionit, Ulsi Manja tha se ndryshimet e miratura ishin dakordësuar me Komision Europian dhe Ministrinë e Drejtësisë, gjë që u pohua nga zv.ministri Tedi Dobi, i pranishëm në komision.
Ndryshimet ligjore kaluan të martën dhe në komisionin për Nismat Qytetare, Bashkëpunimin dhe Mbikëqyrjen Institucionale, ku kryetari Fatmir Xhafaj tha se ato synojnë të adresojnë në mënyrë thelbësore dhe jo formale rekomandimet e përsëritura në rezolutat e Kuvendit të Shqipërisë dhe në raportet e institucioneve ndërkombëtare, por që nuk zgjidhin të gjitha problematikat që ka sistemi i drejtësisë. /Birn/
