Monika Kryemadhi sqaron sekuestrimin e celularit: Gjykata tha se nuk është i imi, pse nuk u pyet Kuvendi?

Monika Kryemadhi ka publikuar një reagim në rrjetet sociale, ku i drejton katër pyetje ish-kreut të SPAK, Altin Dumani, lidhur me hetimin dhe dosjen e ngritur ndaj saj. Në postimin e saj, Kryemadhi pretendon se dosja prej 240 faqesh, e cila sipas saj është ndërtuar mbi biseda telefonike, është e paligjshme.

Ajo vë në pikëpyetje bazën ligjore dhe provat mbi të cilat mbështetet akuza.

Postimi i Kryemadhit

ZARF I ZI PËR SPAK-un e ALTIN DUMANIT

Pretendoni se keni ndërtuar një dosje prej 240 faqesh mbi bisedat e telefonit të Monika Kryemadhit.

Por lindin disa pyetje:

1- Me vendimin nr. 481, datë 17.12.2023, gjykata vendosi se telefoni nuk është i Monika Kryemadhit.

2- Atëherë, mbi çfarë provash mbështetet akuza?

3- Nëse, përkundrazi, pretendoni se telefoni është i saj, atëherë ku është autorizimi i kërkuar sipas nenit 73 të Kushtetutës dhe nenit 288 të Kodit të Procedurës Penale?

4- Me çfarë vendimi gjykate është hapur telefoni im?

Këto pyetje kërkojnë përgjigje të qarta. Shihemi ……