Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
POLITIKE
Monolog justifikimi për 21 Janarin/ Rama sulmon drejtësinë dhe gjyqtarët!
PiranjatPërditësimi i fundit 21 January 2026, 10:48
Edi Rama është prej vitit 2013 në pushtet, por shpesh ai flet sikur nuk ka asgjë në dorë, kurse në disa raste del mbi çdo institucion si ‘gjel’ i krekosur.
Çdo 21 Janar, kryeministri Edi Rama rikthehet me të njëjtin refren: “Duam drejtësi”.
Madje kryeministri harron kontradiktën ku bie, pasi shpesh është dëgjuar të thotë që drejtësinë e ndërtoi partia e tij.
Dhe pse vetë ai për protestën e dhunshme ku u synua të merret me forcë godina e kryeministrisë, kurrë nuk mori asnjë përgjegjësi.
Sot, 15 vite pas vrasjes së katër demonstruesve në bulevard, Rama priti sërish Kryeministri familjarët e viktimave, ku mbajti një fjalim të gjatë, të shoqëruar me justifikime, akuza dhe sulme politike.
Dhe njëherë ai u demonstroi atyre se këtë e bën vetëm për politikë.
Në deklaratën e tij, kreu i qeverisë kërkoi drejtësi për 21 Janarin, por theksoi se ajo nuk duhet kërkuar nga qeveria, duke e zhvendosur përgjegjësinë jashtë godinës së Kryeministrisë.
“Kush kërkon nga ne pse nuk është bërë drejtësi për 21 Janarin, le të shohë te stacioni i trenit dhe jo te kjo godinë”, u shpreh Rama, duke shtuar se nga Kryeministria ka dalë vetëm “bërthama e reformës në drejtësi”.
Si çdo vit, Rama sulmoi drejtpërdrejt kreun e PD Sali Berisha, duke e akuzuar për përgjegjësi direkte në ngjarjen tragjike.
Në fjalimin e tij, Rama nuk kurseu as sulmet ndaj gjyqësorit, duke i etiketuar disa gjyqtarë si ndjekës të verbër të prokurorëve.
“Një pjesë e madhe të paraburgosurve janë viktima të karshillëkut të hatashëm ndaj lirive të të drejtave të njeriut nga ana e prokurorëve të një niveli dhe gjykatësve që shpesh i vejnë nga mbrapa prokurorëve si delja dashit për çore”, u shpreh kreu i qeverisë.
Kryeministri kritikoi gjithashtu SPAK-un, duke e akuzuar Prokurorinë e Posaçme se për vite me radhë ka shmangur çështjen e 21 Janarit dhe ka shpenzuar energji në hetime që, sipas tij, “ngjajnë më shumë me romane satirike sesa me vendime gjyqësore”.
“Fatkeqësisht për vite me radhë, edhe vetë SPAK-u bëri sikur kjo çështje nuk ekziston. Apo ka shpenzuar energji për vite duke mbajtur peng punë me interes shtetëror dhe punonjës shteti, me çështje që janë aq të sforcuara, sa mund të shkruash romane satirike, jo vendime gjyqësore të formës së prerë fajësie”, deklaroi Rama.
Deklaratat e Ramës nxjerrin në pah një kontradiktë të fortë politike: thirrjet për drejtësi për 21 Janarin shoqërohen me sulme të drejtpërdrejta ndaj institucioneve që, sipas tij, duhet ta japin atë drejtësi.
