Mospërfshirja e himnit shqiptar, reagon kryebashkiaku Pali Kolefski: Kërkova zbatimin e protokolllit, por isha vetëm i ftuar

Për herë të dytë radhazi, gjatë zhvillimit të Festivalit Folklorik Maqedonas në Bashkinë e Pustecit, është shkelur protokolli zyrtar duke ekzekutuar vetëm himnin e Maqedonisë së Veriut dhe duke injoruar atë shqiptar.

I pranishëm në këtë aktivitet ishte edhe kryeministri i RMV-së, Hristijan Mickoski, pranë të cilit qëndronin kryebashkiaku aktual Pali Kolefski dhe organizatori i eventit, ish-kryetari i bashkisë Edmond Themelko, kryetar i shoqatës VMRO Shqipëri.

I pyetur rreth këtij incidenti protokollar brenda territorit të Republikës së Shqipërisë, kryetari i Bashkisë Pustec, Pali Kolefski, deklaroi se kishte kërkuar paraprakisht përfshirjen e himnit kombëtar shqiptar. Edhe pse sqaroi se Bashkia e Pustecit ishte thjesht e ftuar në këtë koncert dhe jo organizatore e tij, Kolefski kërkoi ndjesë publike për situatën e krijuar.

“Të them të drejtën, para se të zhvillohej ky aktivitet, kam kërkuar nga organizatorët, konkretisht nga kryetari i shoqatës së VMRO Shqipëri. I kam kërkuar programin zyrtar, ku më kanë thënë që ka këngë e valle tradicionale maqedonase dhe do të hapet me himnin maqedonas. I kam kërkuar që, në momentin që do të ekzekutohet himni maqedonas, duhet të jetë patjetër edhe himni shqiptar, sepse është në çdo protokoll, në çdo pritje zyrtare ose hapje të ceremonive zyrtare.

Duhet patjetër të jetë dhe himni i shtetit, sepse ne jemi shtetas shqiptarë, jetojmë këtu dhe duhet të respektohet himni. Kërkoj ndjesë, vërtet, pavarësisht se nuk më takon mua, sepse s’kam qenë organizator si Bashki e Pustecit, si organizator i këtij aktiviteti. Kemi qenë të ftuar në këtë koncert. Megjithatë, kërkoj ndjesë. Edhe kryeministri maqedonas nuk e priti mirë këtë”, u shpreh ai.