Ndodh për herë të dytë në Pustec! Kryeministri maqedonas në Shqipëri, shkelet sërish protokolli me himnin kombëtar

Pusteci është bërë sot qendra e Festivalit Folklorik Maqedonas, një aktivitet ku i pranishëm ishte edhe Kryeministri i Maqedonisë së Veriut, Hristijan Mickoski. Megjithatë, ngjarja u shoqërua sërish me debate lidhur me respektimin e protokollit shtetëror, pasi gjatë ceremonisë u luajt vetëm himni i Maqedonisë së Veriut, duke anashkaluar atë kombëtar shqiptar.

Sipas udhëzimeve, në të tilla raste duhet të vendoset himni kombëtar i vendit përkatës ai shqiptar e më pas ai maqedonas, protokoll i cili nuk është zbatuar. Mosekzekutimi i himnit shqiptar gjatë vizitës së kryeministrit maqedonas në Pustec, ku të pranishëm ishin edhe drejtuesit lokalë Pali Kolefski e Edmond Themelko, ka ngritur pikëpyetje mbi arsyet e kësaj shkeljeje të përsëritur të protokollit shtetëror brenda territorit të Shqipërisë.

Gjatë fjalës së tij, kryeministri Mickoski u ndal gjerësisht te mbështetja për komunitetin maqedonas në Prespën e Vogël, duke premtuar ndihmë konkretisht nga qeveria e tij përmes projekteve arsimore, kulturore dhe lidhjeve më të forta institucionale.

“Dëshirojmë që një pjesë të këtyre projekteve, brenda mundësive tona, ta mbështesim. Mësoni, udhëtoni, flisni gjuhë të huaja, jini të suksesshëm dhe qytetarë modernë evropianë, por kurrë, kurrë mos e harroni gjuhën tuaj amtare maqedonase, historinë e familjes suaj dhe vendin nga i cili e keni origjinën,” deklaroi ai, duke e cilësuar këtë festival si një dëshmi se kufijtë nuk mund të ndajnë kulturën dhe përkatësinë.