Vijon operacioni i kërkim-shpëtimit për gjetjen e trupit të Armando Zajsi nga Laçi, që humbi jetën dy dit&...
POLITIKE
Auron Tare: Protestat nuk dëmtojnë turizmin! Kërcënimi i vërtetë është betonizimi i zonave të mbrojtura
PiranjatPërditësimi i fundit 17 Qershor 2026, 11:15
Në një kohë kur protestat për largimin e kryeministrit kanë hyrë në ditën e 18, historiani dhe studiuesi Auron Tare ka kundërshtuar pretendimet e kryeministrit Rama se protestat po ndikojnë negativisht në turizmin shqiptar.
Me anë të një postimi në Facebook, Tare sjell disa argumente që sipas tij hedhin poshtë pretendimet e kreut të qeverisë.
Sipas tij mungesa e paralajmërimeve nga ana e ambasadës amerikane, siç ajo bën zakonisht tregon se nuk ka rrezik për vizitorët e huaj.
Ai argumenton më tej se protestat paqësore mund të kenë edhe një efekt pozitiv, pasi dëshmojnë një shoqëri aktive dhe qytetarë të angazhuar në jetën publike.
“Sot në mëngjes, në Portin e Sarandës mbërriti kroçera amerikane Seabourn. Në industrinë e turizmit dihet mirë se, kur një vend konsiderohet i pasigurt ose i përfshirë nga trazira serioze, të parat që ndryshojnë itineraret janë anijet turistike. Arsyeja është e thjeshtë: kompanitë e kroçerave përballen me kosto shumë të larta siguracionesh dhe shmangin çdo destinacion që klasifikohet si problematik.
Po të ishte Shqipëria një vend i përfshirë nga trazira dhe pasiguri, kjo kroçerë nuk do të ankorohej sot në Sarandë. Përkundrazi, pas saj janë planifikuar të mbërrijnë edhe anije të tjera turistike, sipas kalendarit të zakonshëm të sezonit.
Një tregues tjetër domethënës është fakti se Ambasada Amerikane nuk ka lëshuar asnjë paralajmërim për rrezikshmërinë e protestave në Shqipëri. Kjo tregon qartë se situata nuk perceptohet si kërcënim për vizitorët e huaj.
Madje, mund të thuhet se protestat paqësore e bëjnë një shoqëri më interesante në sytë e turistëve, sepse dëshmojnë se qytetarët janë aktivë dhe të angazhuar në jetën publike të vendit”, shkruan Tare.
Sipas Tares, kërcënimi real për turizmin shqiptar nuk janë protestat, por betonizimi i zonave të mbrojtura, dëmtimi i peizazheve natyrore, ndërtimet pa identitet arkitektonik dhe humbja e trashëgimisë kulturore.
“Kërcënimi i vërtetë për turizmin shqiptar nuk janë protestat. Kërcënimi i vërtetë është betonizimi i zonave të mbrojtura, shkatërrimi i peizazheve natyrore, ndërtimet pa asnjë lidhje me arkitekturën dhe traditën vendase, si dhe transformimi i Shqipërisë në një destinacion pa identitet kulturor.
Turistët nuk udhëtojnë mijëra kilometra për të parë betonin që mund ta gjejnë kudo. Ata vijnë për natyrën, historinë, kulturën dhe veçantinë e këtij vendi. Pikërisht këto janë pasuritë që duhen mbrojtur, nëse duam një turizëm të qëndrueshëm dhe afatgjatë.
Prandaj protesta për te mbrojtur natyrën shqiptare trashëgiminë dhe kulturën tone është jo vetëm një e drejte legjitime por nje shërbim i çmuar qe i behet ketij vendi te rraskapitur nga klasa e vet politike”, mbyll postimin e tij historiani.
