“Rama ik”/ Mbyllet protesta e qytetarëve në mbrojtje të Zvërnecit: Nesër më shumë!

Qytetarët që kundërshtojnë projektet e ndërtimit në zonën e Zvërnecit kanë paralajmëruar vijimin e protestave edhe në ditët në vijim, në Tiranë. Nga Bulevardi “Dëshmorët e Kombit”, pjesëmarrësit përcollën mesazhin “Nesër më shumë”, duke njoftuar tubimin e ri të martën në orën 18:00 para Kryeministrisë.

Gjithashtu, një nga momentet simbolike të tubimit ishte ndezja e blicave të telefonave celularë nga protestuesit në Bulevard, në shenjë sensibilizimi dhe mbështetje për kauzën të cilën tanimë ata e kanë nisur dhe po e çojnë përpara.

Organizatorët deklaruan se reagimi qytetar do të vijojë edhe në ditët e ardhshme, ndërsa u bënë thirrje qytetarëve t’u bashkohen protestave kundër ndërtimeve që, sipas tyre, rrezikojnë një nga zonat më të rëndësishme natyrore të vendit.

Gjatë protestës, qytetarë, aktivistë dhe përfaqësues të shoqërisë civile shprehën kundërshtimin e tyre ndaj ndërhyrjeve në Zvërnec si dhe apeluan për anulimin e projektit të parashikuar.

Të shtunën qytetarët dhe aktivistët u dhunuan barbarisht nga rojet private të sigurisë në vendin ku janë parashikuar investimet në Zvërnec.