Të 13 qytetet e monitoruara në Shqipëri e tejkaluan kufirin referues të zhurmës gjatë ditës në vitin 2025, ndërsa n...
POLITIKE
"Nuk ka rinovim të marrëveshjes me Melonin"/ Ferit Hoxha tërheq deklaratën, sqaron se ka folur pa lejen e Ramës
PiranjatPërditësimi i fundit 12 Maj 2026, 15:29
Ministri i Jashtëm i Shqipërisë, Ferit Hoxha, ka deklaruar ditën e sotme se marrëveshja mes Shqipërisë dhe Italisë për emigracionin nuk pritet të zgjatet pas vitit 2030.
Në një intervistë për Euractiv, Hoxha u shpreh se deri atëherë Shqipëria synon të jetë anëtare e Bashkimit Europian dhe se nuk sheh arsye për rinovimin e marrëveshjes.
Por pak orë pas kësaj deklarate, në një postim në “X”, Hoxha ka sqaruar deklaratën, duke thënë se kjo e fundit lidhet me pyetjen e një gazetari në Bruksel dhe sipas tij nuk bëhet fjalë për një vendim, por thjesht për një reflektim të çastit, të shprehur me spontanitet.
Me pak fjalë, kryediplomati shqiptar pranon se nuk e ka diskutuar me Edi Ramën dhe nuk ‘ka marrë leje’ për këtë deklaratë të dhënë për gazetarin në Bruksel.
‘Kjo deklaratë nuk duhet në asnjë mënyrë të interpretohet si një ndryshim i qëndrimit të Shqipërisë në lidhje me protokollin’, shkruan Hoxha ndër të tjera.
Një gazetar në Bruksel më pyeti nëse protokolli ndërmjet Shqipërisë dhe Italisë do të rinovohej pas përfundimit të periudhës fillestare pesëvjeçare.
Unë iu përgjigja duke thënë: “Nuk jam i sigurt, duke supozuar se deri atëherë Shqipëria do të jetë një shtet anëtar i Bashkimit Evropian dhe situata, për rrjedhojë, do të jetë ndryshe.”
Ka qenë kaq e thjeshtë. Nuk bëhet fjalë për një vendim, por thjesht për një reflektim të çastit, të shprehur me sinqeritet dhe spontanitet.
Kjo deklaratë nuk duhet në asnjë mënyrë të interpretohet si një ndryshim i qëndrimit të Shqipërisë në lidhje me protokollin.
Fatkeqësisht, në botën e sotme, zhurma shpesh përhapet më shpejt sesa argumenti, logjika dhe konteksti.
Shprehje të shkëputura nga konteksti shndërrohen shumë shpesh në narrativa që nuk pasqyrojnë as thelbin e diskutimit dhe as qëndrimin real të qeverive.
