“Orikumi të bëhet sërish bashki”/ Ilir Meta mbështet protestën: Nuk mund të trajtohet më si 'aneks i Vlorës'

Kërkesa e banorëve të Orikumit për rikthimin e statusit të bashkisë ka marrë mbështetjen e kreut të Partisë së Lirisë, Ilir Meta.

Pas protestës së zhvilluar nga banorët, Meta e ka cilësuar kërkesën për njësi të veçantë vendore si legjitime, ndërsa ka kritikuar mënyrën se si është administruar Orikumi pas bashkimit me Bashkinë e Vlorës.

Sipas Metës, bashkimi nuk ka sjellë përmirësimin e shërbimeve dhe zhvillimin që banorët kanë pritur. Ai përmend ndër problematikat kryesore furnizimin me ujë të pijshëm, menaxhimin e mbetjeve urbane dhe shërbimet bazë për qytetarët.

Meta argumenton se Orikumi ka potencial të madh ekonomik dhe turistik, duke përfshirë si zonat malore, ashtu edhe bregdetin. Sipas tij, një administrim i veçantë vendor do të mundësonte shfrytëzimin më të mirë të këtyre potencialeve dhe krijimin e vendeve të reja të punës.

“Potencialet për zhvillimin e Orikumit, që të jetë bashki më vete, janë të jashtëzakonshme, nga turizmi malor te ai bregdetar, që mund të krijojnë mirëqenie dhe vende pune për mijëra familje”, shkruan Meta.

Kreu i Partisë së Lirisë e lidh këtë çështje edhe me propozimin e opozitës për rikthimin e 100 bashkive. Sipas tij, një ndarje e tillë do t'i afronte shërbimet dhe vendimmarrjen më pranë banorëve.

“Alternativa e opozitës për rikthimin e 100 bashkive është rruga e vetme për t’iu kthyer shërbimet më pranë qytetarëve dhe për t’i dhënë fund rrëmbimit të pushtetit vendor dhe financave të tij”, shprehet Meta.

Në reagimin e tij, ai u drejtohet edhe banorëve të Selenicës, duke i ftuar të kundërshtojnë çdo bashkim të mundshëm të bashkisë së tyre me Vlorën.

Meta e ka zgjeruar akuzën edhe ndaj kryeministrit Edi Rama dhe Bashkisë së Vlorës. Ai pretendon se Rama ka kontroll “de facto” mbi bashkinë dhe se interesat kryesore lidhen me tokat në zonën bregdetare dhe ndërtimet.

Në këtë kuadër, Meta përmend edhe ndryshimet në drejtimin e institucioneve të Kadastrës, duke pretenduar se shkarkimi i më shumë se 15 drejtuesve lidhet me interesat për zhvillimin dhe betonizimin e bregdetit.

Ndërkohë, protesta e banorëve të Orikumit rikthen në vëmendje debatin për ndarjen territoriale dhe kërkesat për riorganizimin e njësive vendore. Për banorët që kërkojnë rikthimin e bashkisë, çështja lidhet me përfaqësimin lokal dhe me mënyrën se si ofrohen shërbimet publike.