“Patriotizëm nuk është një foto në Instagram”, Fjoralba Ponari nga protesta për Zvërnecin: Toka dhe deti janë trashëgimi, jo plaçkë!

Moderatorja Fjoralba Ponari iu bashkua protestës kundër projektit turistik në Zvërnec, duke përcjellë një mesazh të fortë për mbrojtjen e mjedisit dhe trashëgimisë natyrore të vendit.

Duke folur para protestuesve të mbledhur përpara Kryeministrisë, Ponari theksoi se toka, deti dhe lagunat nuk janë pasuri që mund të trajtohen si plaçkë, por një trashëgimi që duhet ruajtur dhe përcjellë te brezat e ardhshëm.

“Jam mes jush sepse besoj që toka, deti, pemët dhe lagunat janë trashëgimi, jo plaçkë. Ne kemi detyrën t’i trashëgojmë dhe t’i mbrojmë. Patriotizëm nuk është të postosh një foto në Instagram apo të valëvitësh flamurin vetëm për festa. Patriotizëm është të dalësh kur Atdheu të thërret, për tokën e përbashkët dhe për trashëgiminë tonë”, u shpreh ajo.

Ponari u bëri thirrje qytetarëve të lënë mënjanë ndasitë politike, fetare apo shoqërore dhe të bashkohen për atë që e cilësoi një kauzë kombëtare.

“Ju bëj thirrje të gjithë bashkëqytetarëve të lëmë ndasitë dhe diferencat. Kjo është një thirrje për secilin prej jush, pa dallim gjinie, feje apo bindjeje politike. Kjo është thirrja e shqiptarëve për shqiptarët”, deklaroi ajo.